Toshkentda BYD haydovchisi qasddan YPX inspektorini urib yubordi

Toshkentda BYD haydovchisi qasddan YPX inspektorini urib yubordi. Holat yuzasidan jinoyat ishi qo‘zg‘atildi.

Poytaxt IIBB matbuot xizmatining xabar qilishicha, 12-may kuni taxminan soat 19:20 larda Chilonzor tumaniga xizmatga jalb qilingan YPX inspektori o‘z xizmat vazifasini o‘tayotgan vaqtida Lutfiy ko‘chasi bo‘ylab harakatlanib kelayotgan BYD rusumli avtomobil harakat davomida shubha uyg‘otgani sababli hushtak va jezl yordamida to‘xtash ishorasini bergan.

Biroq haydovchi — 2002 yilda tug‘ilgan O.A. (haydovchilik guvohnomasi mavjud emas) YPX inspektorining qonuniy talablariga bo‘ysunmasdan harakatni davom ettirgan va 150-200 metr o‘tib ortga qayrilib olgan vaqtida, YPX inspektori qayta to‘xtash ishorasini berib, avtomashinalar harakatini to‘liq to‘xtatgan.

O.A. IIO xodimining qonuniy talablarini qasddan bajarmagan holda, YPX inspektorini ustiga mashinasini haydab, uni urib yuborgan. Natijada YPX inspektori ikkala son suyagi sinishi tashxisi bilan kasalxonaga yotqizilgan.

Mazkur holat yuzasidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 266-moddasi 1-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Hozirda tergov harakatlari olib borilmoqda.