“Daryo” qisqa hikoyalar tanlovini e’lon qilgani haqida avval xabar berilgandi.
O‘tgan vaqt davomida juda ko‘plab obunachilarimiz tomonidan turli janrdagi bir-biridan qiziq va mazmunli hikoyalar yuborildi. Barcha ijodkorlarni yanada faol bo‘lishga chorlab qolamiz. Tanlov g‘oliblari 30-maydan so‘ng aniqlanadi.
Quyida tahririyatimizga kelgan ba’zi hikoyalarni e’lon qilamiz.
Savdo rastasi
- Bu kitoblar qanchadan?
- 25 mingdan.
-Buncha qimmat, dedi qutisi 20 ming turadigan tamaki tutatgan yo‘lovchi.
Sharofiddinov Ozodbek Jo‘rabek o‘g‘li, Oltinsoy tumani
Xato
O‘g‘il halloslab kelib, onasining oyog‘iga yopishdi: "Endi hech qachon gap qaytarmayman, oyi! Oldingizda uf tortmayman! Ishdan kelganimda "Charchadim, oyi, oyog‘ingizni boshqa kuni uqalab qo‘ya qolay", demayman. Kech qolayotgan bo‘lsam ham, ertalab choyni siz bilan birga ichib ketaman. Xatomni tushundim, oyi, meni kechiring!".
– Qani, baravar ko‘taramiz!
Janozaga kelganlar ayolning tobutini ko‘tarishdi.
Humoyun Haqquli, Toshkent viloyati
"Ishonch"
- Bu hayotda hamma meni aldaydi...
- Nega? Onang va akalaringchi?
- Ular ham meni aldashadi...
- Axir qanaqasiga?!
- Onam "sen yeyaqol, meni qornim to‘q" deb, akalarim esa, oxirgi pullarini menga berib, "olaver, bizga hozir pul kerakmas" deb aldashadi...
Usmonov Xurshid, Jizzax viloyati
Chin sevgi
"Mana men keldim. Yur ketdik! Nima? Bormayman deysanmi?! Yodingdami urishib qolsak, uch kun ichida darrov yarashib olardik. Bugun to‘rtinchi kun, axir", - derdi qabr yonida qo‘lida gul ko‘tarib turgan otaxon.
Saida Ibrohimova, Samarqand viloyati
Odat
Bog‘chada:
- Jim o‘tiramiz, bolalar.
Maktabda:
- Hamma jim o‘tirsin.
Oilada:
- Jim o‘tirib, ovqatingni ye.
Ishxonada:
- Jim yurgin, xo‘pmi?
Xalqaro konferensiyada:
- Ko‘rilgan muammoning yechimi bo‘yicha qanday takliflaringiz bor?
Hamma jim.
Shahlo Aripova
Yuzlar
-Kelavering, bu garderobim. Bular kiyimlarim, oyoq kiyimlarim, yuzlarim...
- Tushunmadim, yuzlaringiz?!
-Ha, shunaqa. Hozir deyarli hammada shunaqa-ku. Qaysi birini taqib chiqishim kimlar bilan ko’rishishimga bog’liq. Masalan, bugun do’stimning uyiga, onasining ta’ziyasi uchun “qayg’urgan”, keyin uchrashuvga “xursand” qiyofamni olishim kerak.
- Tushunarli… Nega anavinisi chang bosgan?
- U “asl” yuzim. Ancha bo’ldi taqmaganimga, yoshligimda taqardim…
Hasanova Gulizoda Zafar qizi
* * *
Eslatib o‘tamiz, qisqa hikoyalar tanlovi 30-mayga qadar davom etadi. O‘z hikoyalaringizni @daryo_hikoyalar_bot orqali yuborishingiz mumkin. Tanlovlar shartlari bilan mana bu yerda tanishishingiz mumkin.
G‘oliblarga “Daryo” internet nashrining hamkori — Asaxiy internet do‘koni tomonidan taqdim qilingan sovg‘alar topshiriladi.
1-o‘ringa — 30 ta kitob
2-o‘ringa — 20 ta kitob
3-o‘ringa — 10 ta kitob
Asaxiy internet do‘konida sotuvda bo‘lgan kitoblar bilan quyidagi havola orqali tanishish mumkin.
Izoh (0)