Ijtimoiy tarmoqlarda Mirobod tumanidagi 213-maktab direktori va ota-onalar janjali aks etgan video lavhalar tarqaldi. Mazkur holat yuzasidan Toshkent shahar Maktabgacha va maktab ta’limi boshqarmasi ma’lumot berdi.
Unga ko‘ra, videoda aks etgan holat 2025-yil 7-aprel kuni taxminan soat 14:40 lar atrofida Mirobod tumanidagi 213-sonli umumta’lim maktabi direktori xonasida ro‘y bergan.
Aniqlanishicha, Qo‘yliq ota mahalla fuqarolar yig‘inida yashovchi K.F. 213-maktabda o‘qimasligiga qaramay bir necha marta maktabga kirib, o‘rtoqlarining darsda o‘tirishiga xalaqit bergani uchun maktab direktori I.S. uni ta’lim muassasasi hududidan chiqarib yuborgan.
Joriy yilning 7-aprel kuni ko‘p marotaba ogohlantirilishiga qaramay, K.F. yana maktab hududida dars vaqtida sobiq sinfdoshi bilan uchrashgan. Buning guvohi bo‘lgan direktor K.F. bilan gaplashib turgan uning tengdoshi 10-sinf o‘quvchisi A.ga tanbeh bergan.
Shu kuni K.F. ning otasi o‘z turmush o‘rtog‘i bilan maktab direktori kabinetiga bostirib kirgan. “Baratxo‘ja” MFY mahalla profilaktika inspektori A.D. ning bir necha marta ogohlantirishiga qaramay, ular direktorga hurmatsizlik qilib, uni so‘kib, tuhmat gaplar bilan haqorat qila boshlashgan. Videodan ko‘rish mumkinki, direktor ham ularni so‘kib, haqoratlagan.
Bundan asabiylashgan maktab direktori ota-onani o‘z xonasidan chiqib ketishlarini talab qilgan. Yuqorida sodir bo‘lgan voqeadan so‘ng, maktab direktori unga hurmatsizlik qilgan va sha’niga noloyiq so‘zlar bilan haqoratlagan fuqaro K.F.ning xatti-harakatlari yuzasidan unga nisbatan qonuniy chora ko‘rilishini so‘rab ichki ishlar idoralariga ariza bilan murojaat qilgan.
Maktabdagi janjallar:
Sirdaryoda o‘qituvchi 1-sinf o‘quvchisini qo‘liga igna sanchish bilan jazolagani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Izoh (0)