Turk va yahudiy rasmiylari Suriyada harbiy to‘qnashuvlarning oldini olish uchun texnik darajadagi muzokaralarni boshladi. Ularga Ozarbayjon mezbonlik qilmoqda. Bu haqda Turkiya tashqi ishlar vazirligi va Isroil siyosiy doiralaridagi manbalarga tayanib Reuters ma’lum qildi.
Turk manbalariga ko‘ra, ushbu muloqotdan maqsad ikki davlat harbiy kuchlari faoliyat yuritayotgan Suriyada ehtimoliy tushunmovchiliklar va to‘qnashuvlarning oldini olishdir.
“Bu mexanizmni shakllantirish bo‘yicha ishlar davom etadi”, degan turk rasmiysi muzokaralar doirasi va davomiyligi kabi tafsilotlarni ochiqlamay.
Isroil hukumati ham turk rasmiylari bilan uchrashuvni tasdiqladi. Bosh vazir Binyamin Netanyaxu idorasi bayonotiga ko‘ra, Isroil delegatsiyasiga muzokaralarda milliy xavfsizlik maslahatchisi Tsoxi Hanegbi boshchilik qilgan. Ammo bayonotda uchrashuv tafsilotlari oshkor etilmagan.
Isroildagi manbaning Reuters’ga ma’lum qilishicha, Tel-Aviv muzokaralarda Suriyadagi xorijiy kuchlarga oid har qanday o‘zgarish, xususan, Palmira hududida Turkiya harbiy bazasi tashkil etilishi ular uchun “qizil chiziq” bo‘lishini va mazkur qadam yahudiy davlati tomonidan “qoidalarni buzish” sifatida baholanishini bildirgan.
Ma’lum qilinishicha, Turkiya armiyasi bunga qadar Suriyadagi kamida uchta harbiy havo bazasini tekshirib, qo‘shin joylashtirish rejalarini muhokama qilgan. Ular orasida Palmiradadagi T-4 bazasi ham bor.
Turkiya va Isroil munosabatlari 2023-yilning 7-oktyabr voqealaridan beri keskin bo‘lib qolmoqda. Biroq shunga qaramay, har ikki tomon Suriyada to‘g‘ridan to‘g‘ri qarama-qarshilikka borishni istamayapti.
Turkiya tashqi ishlar vaziri Xoqon Fidan muzokaralar boshlanganini tasdiqlab, bunday mexanizmlar “ikki mintaqaviy kuch o‘rtasida tushunmovchiliklarning oldini olishda zarur” ekanini ta’kidladi.
Izoh (0)