Islandiya sobiq prezidenti Gudni Torlatsius Yoxannesson milliy Tingvellir bog‘ida gid sifatida ishga joylashdi. Bu haqda Iceland Monitor xabar berdi.
Jurnalist bilan suhbatda Yoxannesson bog‘da qanday ish topganini esladi.
Men 2024-yil 17-iyunda, xuddi bugungiday ajoyib kunda Tingvellirda edim va bog‘ boshqaruvchisi Eynar Semundsen bilan gaplashdim. Kelajagim haqida suhbatlashdik va men: “Shunchaki borib ish qidirishim kerak emasmi? deb so‘radim. U “Bu yerga kelib ishlashni xohlamaysanmi?” degandi, deydi Yoxannesson.
Islandiyaning sobiq rahbari xizmat ko‘rsatish markazida savollarga javob beradi va sayyohlarni bog‘ bo‘ylab olib yuradi. Yoxannesson bu ishni o‘zining davlat xizmatidagi faoliyatining davomi deb biladi.
Bu joy va Islandiya tarixi haqida so‘zlab berish men uchun katta sharaf. Tashrif buyuruvchilarning ko‘pchiligi kimligimni bilmaydi va bu juda ajoyib, deydi sobiq prezident jilmayib.
Tingvellirdagi vazifalaridan tashqari, Yoxannesson tarixchi sifatida faoliyatini davom ettirmoqda va Islandiya universitetida dotsent lavozimida ishlaydi.
Gvidni Yoxannesson 2016-yilda 39,1 foiz ovoz bilan Islandiya prezidenti etib saylangan, 2020-yilda u qayta saylangan. U g‘alaba qozonganini aynan tug‘ilgan kuni bilgan — o‘sha paytda unga 48 yosh to‘lgan edi. Undan oldingi prezident — Oulavyur Ragnar Grimsson — bu lavozimda 20 yil ishlagan va 73 yoshida iste’foga chiqqandi.
2024-yilda Islandiyada bo‘lib o‘tgan prezidentlik poygasida tadbirkor Xalla Tomasdottir (34,3 foiz ovoz) g‘olib bo‘ldi. U Islandiyaning ikkinchi ayol prezidentidir. Saylovda ikkinchi o‘rinni Islandiya sobiq bosh vaziri Katrin Yakobsdottir (25,2 foiz ovoz), uchinchi o‘rinni Arktika muammolari tadqiqotchisi Xalla Xrund Logadottir (15,5 foiz ovoz) egallagandi. Saylovda jami 12 nafar nomzod ishtirok etgan, ularning yarmi ayollar bo‘lgan.
Izoh (0)