Yaponiya Filippinga o‘zining ishlatilgan esminetslarini eksport qiladi. Tokio bu qarorga Pekinning Janubiy Xitoy dengizidagi ta’siriga qarshi turish maqsadida kelgan.
Mahalliy Yomiuri gazetasiga ko‘ra, tomonlar Xitoyga birgalikda qarshi turish uchun hamkorlikni yanada kuchaytirishni rejalashtirmoqda.
Unga binoan, Yaponiya O‘zini mudofaa qilish kuchlari tarkibida 30 yildan ortiq xizmat qilgan Abukuma sinfidagi 6 ta esminets Filippinga topshiriladi. Bu haqda nashr o‘zining hukumatdagi manbalariga tayanib xabar berdi.
“Yaponiya mudofaa vaziri Gen Nakatani va uning filippinlik hamkasbi Gilberto Teodoro o‘tgan oy Singapurda bo‘lib o‘tgan uchrashuvda bu borada kelishuvga erishib, qo‘l siqishgan. Filippin harbiylari ushbu esminetslarni tekshirish uchun shu yozdayoq keladi”, deb yozgan Yomiuri.
Yaponiya mudofaa vazirligi vakili bu borada Reuters’ga izoh berishdan bosh tortdi. Agentlik Filippin harbiylari va Xitoy tashqi ishlar vazirligi vakillaridan ham javob ololmadi.
Tokio Xitoyni Sharqiy Xitoy dengizi, Manila esa Janubiy Xitoy dengizida agressiv harakat qilish va o‘z ta’sir doirasini kuchaytirishda ayblab keladi.
Tomonlar o‘zaro harbiy hamkorlik doirasida vaqti-vaqti bilan qo‘shma mashg‘ulotlar o‘tkazib keladi. Yaloniya va Filippin o‘tgan yili ikki davlat harbiy kuchlarining bir-birlari hududida joylashtirishga imkon beruvchi kelishuvni imzoladi.
Ma’lumot uchun, Abukuma sinfidagi esminetslar nisbatan kichik kema bo‘lib, taxminan 120 kishilik ekipajga ega. Ular suvosti kemalariga va kemalarga qarshi raketalar, torpedolar va to‘plar bilan jihozlangan.
Filippin dengiz kuchlari hozircha esminetslarga ega emas, mamlakat harbiy flotida faqat fregatlar va korvetlar mavjud bo‘lib, ular odatda kichikroq va yengil qurollangan bo‘ladi.
Izoh (0)