Ozarbayjonning AZAL aviakompaniyasiga tegishli yo‘lovchi samolyotini nishonga olish buyrug‘i Rossiyaning 51-havo mudofaa diviziyasi komandiri, general-mayor Aleksandr Tolopilo tomonidan berilgan. Bu haqda rossiyalik podpolkovnikning ko‘rsatmasiga tayanib Minval nashri xabar berdi.
Ichki tergov davomida diviziyaning navbatchi zobiti, podpolkovnik Nikolay Orlyanskiy shunday bayonot bergan. U Tolopilodan buyruq olganidan so‘ng, kapitan Paladichukka “aniqlanmagan havo nishonini yo‘q qilish” haqida ko‘rsatma bergan. Biroq keyinchalik bu nishon fuqarolik samolyoti ekani aniqlangan.
Minval tahririyatiga yuborilgan anonim maktubga ko‘ra, 2024-yil dekabrida kapitan Paladichuk boshchiligidagi jangovar ekipaj Tolopiloning operativ boshqaruvi ostida bo‘lgan. General-mayor Tolopilo voqeaga bevosita aloqador bo‘lishiga qaramay, jinoiy javobgarlikdan qutulgani aytilmoqda.
U aybni Rossiya Havo harakatini tashkil etish yagona tizimining Rostov markazi xodimlariga yuklagan va ataylab yolg‘on ko‘rsatma bergan, deyiladi xatda.
Tolopilo “Pansir-S” havo mudofaa tizimidan uchirilgan raketalar o‘z-o‘zini yo‘q qilganini va samolyotga zarar yetmaganini da’vo qilgan. Biroq bu bayonotlar Rossiya Tergov qo‘mitasining 505-harbiy tergov bo‘limi tomonidan o‘tkazilgan ichki surishtiruvda rad etilgan.
Havo mudofaa tizimi bo‘linmasi texnik va tashkiliy jihatdan yaroqsiz holatda bo‘lgan. Shu sababli ekipaj fuqarolik samolyotini o‘z vaqtida aniqlay olmagan, deydi Minval nashri.
Shunga qaramay, general Tolopilo nafaqat jazodan ozod etilgan, balki lavozimi oshgan. U Rossiya Sharqiy harbiy okrugi havo mudofaa kuchlarining 11-gvardiyachi armiyasi qo‘mondoni o‘rinbosari etib tayinlangan.
Minval nashri uning suratini ham e’lon qilgan. Suratda u hali polkovnik unvonida tasvirlangan. General-mayor unvoni unga 2022-yil 17-fevralda, prezident Vladimir Putinning 64-sonli farmoni bilan berilgan.
O‘zi nima bo‘lgandi?
2024-yil 25-dekabr kuni Oqtov aeroportidan uch kilometr uzoqlikda Ozarbayjonning Azerbaijan Airlines (AZAL) aviakompaniyasining Embraer samolyoti ishtirokida fojiali aviahalokat yuz berdi. Boku—Grozniy reysini amalga oshirayotgan samolyot favqulodda qo‘nishga urinish chog‘ida halokatga uchradi. Bortda 62 nafar yo‘lovchi va 5 nafar ekipaj a’zosi bo‘lgan.
38 kishi halok bo‘lgan, yana 29 kishi jarohatlangan. Prezident Ilhom Aliyevning ta’kidlashicha, layner radioelektron kurash vositalari yordamida boshqarilmaydigan holatga keltirilgan va keyin Rossiya hududidan hujumga uchragan. Uchuvchilar Rossiyaning eng yaqin aeroportlaridan biriga favqulodda qo‘nishni so‘ragan. Biroq ularga hamma joyda rad javobi berilgan, shundan so‘ng samolyot Kaspiy dengizini kesib o‘tib, Oqtov shahriga qulagan.
Aliyev halokat uchun javobgarlikni Rossiyaga yuklab aybdorlarni jazolashni talab qilgan. U, shuningdek, Moskvaning samolyotning havo hujumidan mudofaa tizimidan o‘qqa tutilishi faktini qushlar bilan to‘qnashuv va bortdagi gaz balloni portlashi haqidagi “bema’ni taxminlar yordamida yashirish”ga urinishlaridan g‘azablangan.
Halokatni tergov qilishda ICAO (Xalqaro fuqaro aviatsiyasi tashkiloti) konvensiyasiga muvofiq Qozog‘iston boshchilik qilmoqda. Ishda Ozarbayjon, Rossiya mutaxassislari, xalqaro ekspertlar va Embraer vakillari ishtirok etmoqda. Qora qutilar olib qo‘yilib, xalqaro ekspertlar ishtirokida rasshifrovka qilinmoqda.
Izoh (0)