Markaziy bank tijorat banklari tomonidan markazlashgan mablag‘lar hisobidan ajratiladigan ipoteka kreditining yillik foiz stavkasi 0,5 foizga pasayganini ma’lum qildi.
26-iyuldan Markaziy bank boshqaruvining qaroriga asosan asosiy stavka 13,5 foizga pasaytirilgandi. Shu sababli markazlashgan mablag‘lar hisobidan ajratiladigan ipoteka kreditining yillik foiz stavkasi mutanosib ravishda pasaydi.
O‘zbekistonda ipoteka kreditlari quyidagi tijorat banklari tomonidan ajratiladi:
- “Asaka bank”
- “Milliy bank”
- “Xalq” banki
- “Aloqabank”
- “Sanoatqurilishbank”
- “Biznesni rivojlantirish” banki
- “Mikrokreditbank”
- “Turon bank”
- “Agrobank”
- “Hamkor bank”
- “Oriyent finans bank”.
“2024-yilda ipoteka kreditlarini ajratish mexanizmlarini takomillashtirish va aholining uy-joy sharoitlarini yaxshilashga oid qo‘shimcha chora-tadbirlar to‘g‘risida”gi prezident farmoni qabul qilingandi. Unga ko‘ra, mazkur kredit miqdori Qoraqalpog‘iston Respublikasi va viloyatlarda — 330 million so‘mgacha, Toshkent shahrida — 420 million so‘mgacha.
Qarz oluvchi tomonidan birlamchi uy-joy bozorida kvartira sotib olish uchun zarur bo‘lgan ipoteka kreditining miqdori dasturda ko‘rsatilgan miqdordan yuqori bo‘lganda, banklar o‘z hisobidan kreditning yetmagan qismini bozor tamoyillariga asoslangan ipoteka kreditlarini ajratish orqali moliyalashtirishi mumkin.
Birlamchi uy-joy bozoridagi kvartiralarni sotib olish uchun ipoteka kreditlarini ajratishda ipoteka predmetini sug‘urta xavflaridan sug‘urta qilish talabi bekor qilindi.
Mazkur ipoteka krediti rasmiy daromadga ega bo‘lmagan fuqarolaga ham ajratiladi.
Uy-joy sharoitini yaxshilashga muhtoj bo‘lgan shaxslarga yakka tartibdagi uy-joy qurish, rekonstruksiya qilish va ta’mirlash uchun 120 million so‘mgacha ipoteka kreditlari ajratiladi. Bunday fuqarolarga budjet mablag‘lari hisobidan 30 million so‘m miqdorida subsidiya ham to‘lanadi.
Izoh (0)