Fransiyada 55-Parij havo ko‘rgazmasi 16—22-iyun kunlari Parij yaqinidagi Le Burje aerodromida bo‘lib o‘tmoqda. Unda tadbir tashkilotchilari ochilishdan oldin Isroil pavilyonini yopib qo‘ydi. Bu haqda Anadolu xabar berdi.
Aytilishicha, tadbir tashkilotchilari “Fransiya hukumati nomidan” Isroil mudofaa kompaniyalari pavilyonlaridan hujumkor va kinetik qurollari namunalarini olib tashlashni talab qilgan. Isroil vakillari esa talablarni bajarishdan bosh tortgan. Shundan so‘ng Isroil pavilyoni yopib qo‘yilgan.
Stendlarda Elbit Systems, Rafael, IAI va Uvision kompaniyalarining aviatexnikalari namoyishga qo‘yilgan edi. Uskunalar ko‘rsatilmagan uchta kichikroq Isroil stendlari va Isroil Mudofaa vazirligi stendi esa namoyish uchun ochiq qolmoqda.
Isroil Mudofaa vazirligi matbuot kotibi Amir Baram tashkilotchilarning harakatlarini “bir tomonlama va siyosiy motivatsiyalangan” deb atagan. Isroil mudofaa kompaniyalariga 2024-yilning iyun oyida Parijda bo‘lib o‘tgan dunyodagi eng yirik qurol-yarog‘ ko‘rgazmasi — “Eurosatory 2024”da ishtirok etish taqiqlangan edi.
Birinchi marta 1909-yilda o‘tkazilgan va Fransiya Aerokosmik sanoat uyushmasi tomonidan tashkil etilgan shou Parij shimoli-sharqidagi Le Burje shahrida bo‘lib o‘tadi.
Isroilning uzoq yillik ittifoqchisi bo‘lgan Fransiya asta-sekin G‘azodagi harakatlari va xorijdagi harbiy zarbalari uchun Binyamin Netanyaxu hukumatiga nisbatan o‘z pozitsiyasini o‘zgartirgan. Fransiya prezidenti Emmanuel Makron yahudiy davlatining Eronga zarbalari munosabati bilan “barcha tomonlarni maksimal darajada vazmin bo‘lishga va keskinlikni yumshatishga” chaqirgan.
Izoh (0)