Tramp Los Anjelesdagi namoyishlarni to‘xtatish uchun Milliy gvardiya askarlarini yubordi

AQSHning Kaliforniya shtati Los Anjeles shahrida ikkinchi kun ketma-ket Immigratsiya va Bojxona xizmati (ICE) tomonidan o‘tkazilayotgan reydlarga qarshi ommaviy norozilik namoyishlari davom etmoqda. Prezident Donald Tramp 2000 nafar Milliy gvardiya askarlarini yuborish haqida farmoyish berdi. Bu haqda prezident matbuot kotibi Kerolayn Livittga tayanib  DW nashri xabar berdi. 

Tramp o‘zining Truth Social ijtimoiy tarmog‘ida Kaliforniya gubernatori Gevin Nyusom va Los Anjeles meri Karen Bassga tahdidlar bilan murojaat qilgan edi.

AQSH prezidenti agar ular o‘z ishlarini bajara olmasalar, federal hukumat aralashishini va tartibsizliklar hamda talonchiliklar muammosini hal qilishini aytgandi.

AQSH Ichki xavfsizlik vazirligi bo‘limi San Diego shahridagi ikki restoranga o‘tkazilgan reydlar chog‘ida portlovchi chiroq-shovqin granatalarini qo‘llagan edi.

Namoyishchilar huquqni muhofaza qiluvchi xodimlarga beton bo‘laklarini otgan. Bir hafta davomida Los Anjeles atrofidagi hududlarda immigratsiya qonunchiligini buzganlikda gumon qilingan 118 kishi qo‘lga olingan.

Qo‘shma Shtatlar prezidenti Milliy gvardiyani muayyan maqsadlarda, jumladan, “namoyishlarni bostirish” uchun foydalanish vakolatiga ega.