“Endi davlat fuqarolik xizmatchisini noqonuniy bo‘shatish rahbarga juda qimmatga tushadi” — huquqshunos

Noqonuniy bo‘shatishlar natijasida davlat organlaridan undirilgan summalar birma-bir sarhisob qilinadi. Bu haqda mehnat huquqi bo‘yicha mutaxassis Saidali Muxtoraliyev “Daryo”ga maʼlum qildi.

Huquqshunosning tushuntirishicha, “Davlat fuqarolik xizmati to‘g‘risida”gi qonunning 51-moddasida (davlat fuqarolik xizmatchisi faoliyatining qonunga xilof ravishda tugatilishi oqibatlari) shunday deyilgan:

➖ Davlat fuqarolik xizmati lavozimiga tiklangan davlat fuqarolik xizmatchisiga uning faoliyati qonunga xilof ravishda tugatilgani tufayli yetkazilgan zararning o‘rni O‘zbekiston Respublikasi Davlat byudjeti mablag‘lari hisobidan qoplanadi.

➖ Davlat fuqarolik xizmatchisi faoliyatining qonunga xilof ravishda tugatilishida aybdor bo‘lgan shaxs qonunda belgilangan tartibda javobgar bo‘ladi. Davlat fuqarolik xizmatchisi faoliyatining qonunga xilof ravishda tugatilishi bilan bog‘liq zararning miqdori aybdor shaxsdan regress tartibida undiriladi.

Bu normalar faol holatga kirgan ekan, endi noqonuniy bo‘shatishlar natijasida davlat organlaridan undirilgan summalar birma-bir sarhisob qilinadi. Byudjetdan undirilgan har bir so‘m va har bir tiyin aybdor shaxslarning cho‘ntagidan regress tartibda qayta undirib olinadi, dedi huquqshunos.

Davlat fuqarolik xizmatiga oid muhim o‘zgarishlar

Prezidentning davlat fuqarolik xizmatiga doir farmoniga muvofiq 2026-yil 1-yanvardan boshlab davlat xizmatchilari lavozim maoshi ularning ish tajribasi, ilmiy va malaka darajasi, natijadorligi hamda boshqa ko‘rsatkichlardan kelib chiqib shakllantiriladi.

Yana bir muhim o‘zgartirish — davlat xizmatiga birinchi marta qabul qilingan davlat xizmatchilari bilan mehnat shartnomasi dastlab bir yil muddatga tuziladi va keyinchalik faoliyatining ijobiy natijalariga ko‘ra mehnat shartnomasi nomuayyan muddatga uzaytiriladi.

Milliy darajadagi davlat organlari fuqarolik xizmati lavozimlarining reyestri tasdiqlandi. Endilikda, yaʼni 20-iyundan boshlab davlat fuqarolik xizmatchisiga o‘rtacha oylik ish haqining 30 foizidan ko‘p bo‘lmagan miqdorda jarima qo‘llaniladi.

Korrupsiyaga qarshi kurashish agentligining maʼlum qilishicha, davlat xizmatchisining sovg‘a bilan bog‘liq talablarga rioya etilmaganlik uchun javobgarligi masalasi ko‘rib chiqilmoqda.