“O‘zgidromet” 6 ta viloyatning tog‘li hududlarida qor ko‘chishi xavfi borligidan ogohlantirdi.
Ma’lum qilinishicha, 5–9-fevral kunlari kutilayotgan yog‘ingarchilik hamda havo haroratining o‘zgarishi sababli respublikaning tog‘li hududlarida qor ko‘chishi xavfi e’lon qilinadi.
Shu jumladan:
- Qashqadaryo viloyati Dehqonobod, Kitob, Qamashi, Shahrisabz tumanlarida;
- Surxondaryo viloyati Boysun, Qumqo‘rg‘on, Sariosiyo, Uzun tumanlarida;
- Samarqand viloyati Nurobod, Qo‘shrabot, Samarqand, Urgut tumanlarida;
- Jizzax viloyati Baxmal, Zomin tumanlarida;
- Toshkent viloyati Bo‘stonliq, Parkent, Ohangaron tumanlarida (Chotqol tizmasi tog‘lari);
- Namangan viloyati Pop tumanida.
“Tog‘li hududlarda istiqomat qiluvchi fuqarolar, dam oluvchilar hamda tog‘li hududlarda harakatlanuvchi haydovchilardan ehtiyotkorlik choralarini ko‘rishlarini so‘raymiz”, deyiladi xabarda.
Prognozlarga ko‘ra, juma kuni O‘zbekistonga Qozog‘iston hududidan sovuq va nisbatan nam havo massalari kirib kelishi boshlanadi. Buning hisobiga respublika bo‘yicha 6-fevralda ba’zi joylarda yog‘ingarchilik (yomg‘ir qorga aylanadi) bo‘ladi.
So‘nggi marta 28-yanvar kuni Chimyonda qor ko‘chkisi kuzatilgandi. Kuchli yog‘ingarchilik natijasida 300 m3 hajmdagi qor ko‘chgan.
