O‘zbekiston Tashqi ishlar vazirligida 26-yanvar kuni Rossiya elchisi Aleksey Yerxov bilan uchrashuv bo‘lib o‘tdi. Bu haqda idora axborot xizmati xabar berdi.
Qayd etilishicha, yig‘ilishda tashqi ishlar vaziri o‘rinbosari Olimjon Abdullayev Rossiya hududida mehnat qilayotgan O‘zbekiston fuqarolarining huquqlari va qonuniy manfaatlarini himoya qilish masalalarini ko‘targan.
Uchrashuvda Rossiya hududlarida faoliyat yuritayotgan O‘zbekiston bosh konsullari ham ishtirok etdi. Bu joylardagi real vaziyat va amaliy tajribani inobatga olgan holda masalalarni atroflicha muhokama qilish imkonini berdi. Rossiya tomondan esa diplomatik vakolatxonaning konsullik bo‘limi rahbariyati, migratsiya masalalari bo‘yicha mas’ul xodimlar hamda huquqni muhofaza qiluvchi organlar vakillari qatnashdi.
O‘zbekiston tomoni migratsiya tekshiruvlari va reyd tadbirlari davomida fuqarolarning huquqlari va insoniy qadr-qimmatini kamsitishning har qanday ko‘rinishiga yo‘l qo‘yib bo‘lmasligini qat’iy ta’kidladi. Bu talab migratsiya qonunchiligiga rioya qilayotgan fuqarolar bilan bir qatorda, qoidabuzarlik sodir etgan shaxslarga nisbatan ham birdek amal qilishi zarurligi qayd etildi.
Tomonlar migratsiya jarayonlarini tartibga solish, shuningdek, Rossiya Federatsiyasida O‘zbekiston fuqarolarining qonuniy mehnat faoliyati uchun qulay shart-sharoitlar yaratishga qaratilgan muloqotni davom ettirishga kelishib oldi.
Shuningdek, hamkorlikni mustahkamlash maqsadida muntazam konsullik maslahatlashuvlari va ikki tomonlama uchrashuvlar o‘tkazish zarurligi ta’kidlandi.
