Bokuning Haydar Aliyev markazida boshlangan “O‘zbekiston madaniyati kunlari” tadbirlari Fuzuliydagi Mirzo Ulug‘bek umumta’lim maktabida yakunlandi.
“Daryo” muxbirining xabar berishicha, tadbirning yopilish marosimiga bag‘ishlangan konsert dasturidan avval O‘zbekiston madaniyat vazirining birinchi o‘rinbosari Bahodir Ahmedov boshchiligidagi delegatsiya vakillari hamda Ozarbayjon madaniyat vaziri o‘rinbosari Murad Huseynov, Fuzuliydagi Mirzo Ulug‘bek umumta’lim maktabi direktori Hecher Mahmudova va boshqa rasmiylar o‘rtasida uchrashuv bo‘lib o‘tdi.
Uchrashuv davomida prezident Shavkat Mirziyoyev tashabbusi bilan Fuzuliy shahrida barpo etilgan Mirzo Ulug‘bek maktabida “O‘zbekiston madaniyati kunlari”ning yopilishiga bag‘ishlangan tantanali marosimning o‘tkazilishida ham katta ramziy ma’no borligi, qardosh o‘zbek xalqi qalban ozar xalqi bilan birga ekanligi ta’kidlandi.
Uchrashuvdan so‘ng delegatsiya vakillari “O‘zbekiston madaniyati kunlari”ning yopilishiga bag‘ishlangan tantanali marosimda ishtirok etdi.
Foto: O‘zbekiston Madaniyat vazirligi
Foto: O‘zbekiston Madaniyat vazirligi
Ma’lumot o‘rnida, shahar buyuk ozarbayjon shoiri va mutafakkiri Muhammad Fuzuliy nomi bilan atalgan. Mamlakatning janubi-g‘arbiy qismida joylashgan bu shahar azaldan Qorabog‘ning “janubiy darvozasi” hisoblanadi.
Shavkat Mirziyoyev 2021-yilning aprelida Turkiy tilli davlatlar hamkorlik kengashining videokonferensiya shaklida o‘tkazilgan norasmiy sammitida O‘zbekiston Tog‘li Qorabog‘ zaminidagi ko‘hna obidalar, madaniyat va ma’rifat maskanlarini tiklash ishlariga hissa qo‘shishga tayyor ekanini bildirgandi. O‘zbekistondan tuhfa sifatida Tog‘li Qorabog‘da maktab qurilishi aytilgandi.
2025-yilning iyul oyida Ozarbayjonning Xankendi shahrida o‘tkazilgan yirik media-forumda prezident Ilhom Aliyev Tog‘li Qorabog‘ni tiklashda ilk sovg‘ani O‘zbekiston berganini alohida ta’kidlagan.
