Portugaliyalik hujumchi Krishtianu Ronaldu sog‘liqni kuzatuvchi qurilmalar ishlab chiqarishga ixtisoslashgan Whoop kompaniyasining reklama yuziga aylangan. Kompaniya mutaxassislari bir muddat hujumchi bilan ishlashdi va uning turli fiziologik ko‘rsatkichlarini o‘rganishdi.
Tadqiqot natijalariga ko‘ra, Ronaldu biologik jihatdan ancha yosh ekani aniqlandi. Ya’ni, tekshiruvlardan keyin u ayni payt atigi 28,9 yoshda ekanligi ma’lum bo‘ldi. Bu haqda futbolchi Portugaliyaning Record nashri bilan bo‘lgan suhbatda ma’lum qildi.
To‘g‘risi, bu men bunchalik yaxshi holatda ekanimni kutmagan edim. Tekshiruvlarda biologik jihatdan 28,9 yoshda ekanligimni aytishdi. Bu shuni anglatadiki, men hali yana 10 yil futbol o‘ynay olaman, deydi hujumchi.
Eslatib o‘tamiz, Krishtianu Ronaldu fevral oyida 40 yoshni qarshi oldi. Uning “An-Nassr” bilan shartnomasi 2025-yilning iyun oyigacha amal qiladi. Transfermarkt portali hujumchining qiymatini 12 million yevroga baholamoqda.
Ma’lumotlarga ko‘ra, Ronaldu yana ikki yil futbol o‘ynashni maqsad qilgan. U AQSH, Meksika va Kanada maydonlarida o‘tadigan jahon chempionatidan keyin karyerasini yakunlashi mumkin.
Avvalroq futbolchi Klublar o‘rtasidagi Jahon chempionatida ishtirok etish uchun Marokashning “Vidad” jamoasi bilan shartnoma imzolashi mumkinligi aytilgandi.
