“An-Nassr” klubi hujumchisi, portugaliyalik yulduz Krishtianu Ronaldu Saudiya Arabistoniga tashrif buyurishni tavsiya qildi. 40 yoshli futbolchi yaqinda klub bilan shartnomasini 2027-yilgacha uzaytirgan edi.
Ronaldu mamlakatdagi hayotdan mamnunligini bildirib, Saudiya Arabistonida o‘zini xotirjam his qilayotganini ta’kidladi:
Odamlarni bu yerga kelishga ko‘ndirish shart emas. Shunchaki, “kelib ko‘ringlar!” deyish kifoya. Masalan, hozir men Qizil dengiz bo‘yidaman — bu yer menga va oilamga yoqadi, o‘zimni xotirjam his qilaman. Saudiya Arabistonida hayot tinch, shaharlar chiroyli. Bu joy menga juda ma’qul, madaniyati ham o‘ziga xos. Ko‘p narsa o‘zgarganini ko‘rib turibman, — deya Ronaldu so‘zlarini keltiradi “An-Nassr” klubi matbuot xizmati.
Ronaldu Saudiya Arabistonining “An-Nassr” klubiga 2023-yil yanvar oyida kelib qo‘shilgan edi. Futbolchi o‘tgan mavsumda barcha musobaqalar doirasidagi 41 uchrashuvda maydonga tushib, o‘z hisobiga 35 ta gol va 4 ta golli uzatma yozdirib qo‘ygan. Transfermarkt portali hujumchining qiymatini 12 million yevroga baholamoqda.
Portugaliyalik futbolchi bungacha Madridning “Real” klubi, Turinning “Yuventus” jamoasi, Angliyaning “Manchester Yunayted” hamda Lissabonning “Sporting” klublarida to‘p surgan. 2016-yilda esa Portugaliya terma jamoasi safida Yevropa chempioni bo‘lgan.
