Lamin Yamalning so‘nggi “El-Klasiko”dan keyingi gaplaridan “Real” futbolchilari qo‘shimcha motivatsiya olgan. Bu haqda Marca nashriga tayanib Euro-football xabar berdi.
Kubok finalidan keyin 17 yoshli futbolchi shunday degan edi:
Ular qancha gol urishining ahamiyati yo‘q, bu mavsum “Real” bizni yuta olmaydi.
“Qirollik klubi” a’zolari Yamalning bu so‘zlariga munosib javob berishni istamoqda. Shu bois madridliklar navbatdagi o‘yin uchun puxta tayyorgarlik ko‘rib, g‘alaba qozonish borasida reja tuzishgan.
Ma’lumot uchun, 11-may, yakshanba kuni Ispaniya La Ligasining 35-turida “Barselona” o‘z maydonida “Real”ni qabul qiladi. Joriy mavsum jamoalar uch marotaba to‘qnash kelgan va barchasida kataloniyaliklarning qo‘li baland kelgan: 4:0 (La Liga), 5:2 (Ispaniya Superkubogi) va 3:2 (Ispaniya Kubogi). Karlo Anchelotti jamoasi mazkur noxush seriyani to‘xtatib, joriy mavsumdagi so‘nggi “El-Klasiko”da g‘alaba qozonishni istamoqda.
Ayni paytda “Barselona” La Liga turnir jadvalida 79 ochko bilan yetakchilik qilmoqda. “Real” 75 ochko to‘plagan holda 2-pog‘onani band etgan. Agar mazkur bahsda Hansi Flik jamoasi g‘alaba qozonsa, chempionlik uchun katta qadam tashlagan bo‘ladi. Aksincha bo‘lsa, Ispaniya chempionatining so‘nggi turlari yanada qizg‘in kechishi mumkin.
