Shanxay hamkorlik tashkiloti O‘zbekiston, Tojikiston va Qirg‘iziston prezidentlari imzolagan chegara to‘g‘risidagi shartnomani olqishladi.
O‘zbekiston, Tojikiston va Qirg‘iziston davlat chegaralarining tutash nuqtasi to‘g‘risidagi shartnoma 31-mart kuni Xo‘jand shahrida imzolangandi.
“Bu uch davlat o‘rtasidagi o‘zaro ishonch va yaxshi qo‘shnichilik munosabatlarini mustahkamlash yo‘lidagi muhim qadamdir”, deyiladi SHHT xabarda.
A’zo davlatlar ushbu shartnomaning imzolanishi SHHT makonida tinchlik va barqarorlikni ta’minlashga salmoqli hissa qo‘shishini qayd etgan.
31-mart kuni Tojikistonning Xo‘jand shahrida uch mamlakat davlat chegaralari tutashgan hududda Do‘stlik stelasining tantanali ochilish marosimi ham bo‘lib o‘tdi. Tantanali ravishda ochilgan Do‘stlik stelasi qardosh mamlakatlar o‘rtasida mustahkamlanib borayotgan yaxshi qo‘shnichilik, ishonch va strategik sheriklik munosabatlarining yangi ramziga aylanishi qayd etildi.
