Futbol bo‘yicha Elit Osiyo Chempionlar Ligasi 1/8 final uchrashuvlari doirasidagi “Paxtakor” — “Al-Hilol” bahsi bo‘lib o‘tdi. Toshkentdagi “Jar” stadionida kechgan o‘yinda “sherlar” 1:0 hisobida g‘alaba qozondi.
O‘yindagi yagona gol 29-daqiqada Flamarion tomonidan kiritildi. Riaskosning ajoyib uzatmasidan keyin “sherlar”ning braziliyalik futbolchisi Yassin Bunu darvozasini ishg‘ol qildi. Bahsning qolgan daqiqalari ham keskin kurashlar ostida o‘tdi, lekin darvozalarga boshqa to‘p kiritilmadi.
Sofascore portali o‘yindan keyin futbolchilarning maydondagi harakatlarini baholadi. Unga ko‘ra, uchrashuvning eng yaxshi futbolchisi deya himoyachi Hojiakbar Alijonov topildi — 8.0 ball. Uchrashuvni to‘liq o‘tkazgan futbolchi o‘yin davomida 31 marta sheriklariga pas bergan va ularning 20 martasi aniq yetib borgan — 61 foiz. Shuningdek, Alijonov yerda 8 ta kurash olib borgan hamda uning 6 martasida raqibidan ustun kelgan. Hojiakbar 3 marta dribling amalga oshrgan va 2 martasida raqiblaridan tezroq hamda aniq harakat qilgan.
O‘yindagi yagona gol muallifi Flamarion esa 7.6 ball bilan baholandi. Uning goliga hammualliflik qilgan Riaskosning o‘yini esa 6.9 ballga loyiq deb topildi.
“Al-Hilol” safida esa eng yaxshi futbolchi sifatida Kayo Sezar e’tirof etildi — 7.7.
Eslatib o‘tamiz mazkur jamoalar o‘rtasidagi javob bahsi 11-mart kuni Riyodda bo‘lib o‘tadi.
