O‘zbekistonda faoliyat yurituvchi xususiy notariuslar uch yilda 1000 nafardan oshgani ma’lum bo‘ldi. Bu haqda Adliya vaziriga tayanib, uning matbuot kotibi Sevara O‘rinboyeva xabar berdi.
Ta’kidlanishicha, vazir Akbar Toshqulov bu haqda Samarqandda bo‘lib o‘tayotgan Xalqaro notarial hamkorlik komissiyasining navbatdagi yig‘ilishida ma’lum qilgan.
Ikki kun davomida 33 ta davlatdan tashrif buyurgan 150 nafarga yaqin soha vakillari, ekspertlar ishtirokida “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashishda notariusning o‘rni” hamda “Raqamlashtirish asrida notariatning o‘rni” mavzular muhokama qilinadi. Konferensiyada O‘zbekiston Respublikasi adliya vaziri Akbar Toshqulov so‘zga chiqib, oxirgi yillarda mamlakatimizda notariat sohasida amalga oshirilgan islohotlar va kelgusidagi rejalarga to‘xtalib o‘tdi, — deydi vazirning matbuot kotibi.
Tadbirda vazirning ma’lumot berishicha, O‘zbekistonda 2020-yildan xususiy notariuslar faoliyati yo‘lga qo‘yilgan bo‘lib, bugungi kunda mamlakatda 1000 nafardan ortiq xususiy notariuslar faoliyat yuritmoqda.
O‘zbekiston Notarial palatasi tashkil etildi, uning asosiy vazifalari va faoliyat yo‘nalishlari belgilandi. 2022-yilda O‘zbekiston notariat tizimi Xalqaro notariuslar ittifoqining 91-a’zosi bo‘ldi. Fuqarolarga yengillik yaratish maqsadida ko‘chmas mulk ijara va tekin foydalanish shartnomalarini, mulkdorning yaqin qarindoshlariga beriladigan avtotransport vositasini boshqarish uchun ishonchnomalarni, birlamchi bozordagi garov va ipoteka shartnomalarini majburiy notarial tasdiqlash talabi bekor qilindi.
“Notarius” avtomatlashtirilgan axborot tizimiga huquqiy maqom berildi va barcha notarial harakatlar ushbu tizimda ro‘yxatga olinmoqda. Notarial harakat rasmiylashtirish uchun fuqarolardan talab qilinadigan hujjatlar idoralararo elektron hamkorlik orqali notarius tomonidan olinishi yo‘lga qo‘yildi. Fuqarolardan talab etiladigan hujjatlar va ma’lumotlar hajmi 87 foizga qisqartirildi. “E-notarius.uz” rasmiy veb-sayti ishga tushirildi. Ayrim notarial harakatlarni dunyoning istalgan joyidan videokonferensaloqa orqali onlayn ravishda amalga oshirilmoqda, — deydi mas’ul.
Qayd etilishicha, xususiy notarial faoliyatni litsenziyalash “Litsenziya” axborot tizimi orqali to‘liq elektron shaklda amalga oshirilishi yo‘lga qo‘yilgan. Shaffoflikni ta’minlash maqsadida xususiy notariuslarga litsenziya berish bo‘yicha imtihonlar onlayn translyatsiya qilinmoqda.
Tadbirda qo‘shimcha qilinishicha, O‘zbekistonda 2024-yildan boshlab notarial idoraga kelmasdan, chet eldan turib ham mol-mulkdan foydalanish bilan bog‘liq bitimlarni (mulk huquqini boshqa shaxsga o‘tkazishdan tashqari) videokonferensaloqa orqali rasmiylashtirishni yo‘lga qo‘yish maqsad qilingan.
Izoh (0)