Toshkentda Navro‘zga bag‘ishlab teatrlashtirilgan konsert o‘tkaziladi

Shavkat Mirziyoyev 1-mart kuni “2023-yilgi Navro‘z umumxalq bayramiga tayyorgarlik ko‘rish va uni o‘tkazish to‘g‘risida”gi qarorni imzoladi. Hujjat matni O‘zAda e’lon qilindi.

Qaror Birlashgan Millatlar Tashkiloti tomonidan xalqaro bayram deb e’tirof etilgan Navro‘zning ma’naviy hayotdagi o‘rni va ta’sirini inobatga olib, ushbu ayyomni milliy qadriyat va urf-odatlarga uyg‘un tarzda, har tomonlama munosib darajada nishonlash maqsadida qabul qilingan.

Hujjat ko‘ra, Ma’naviyat va ma’rifat markazi Yozuvchilar uyushmasi bilan birgalikda bir hafta muddatda Toshkent shahrida Navro‘z bayramiga bag‘ishlab o‘tkaziladigan teatrlashtirilgan konsert tomoshasining dasturi va ssenariysini ishlab chiqadi.

Mazkur konsert tomoshasini tajribali ssenarist va rejissorlar, kompozitor va bastakorlar, baletmeysterlar, sahna rassomlari, iste’dodli yosh ijrochilar, folklor san’ati vakillarini jalb etgan holda yuqori badiiy saviyada tayyorlash choralari ko‘riladi.