Zelenskiy Ukrainada dengiz dronlari flotini yaratish rejasini e’lon qildi

Ukrainada kelayotgan haftadan dengiz dronlari flotini yaratish uchun mablag‘ yig‘ish boshlanadi, deya ma’lum qildi prezident Vladimir Zelenskiy o‘zining Telegram-kanalidagi videomurojaatida.

Zelenskiy ushbu g‘oyani millionlab ukrainaliklar qo‘llab-quvvatlashiga ishonch bildirdi: “Menimcha, hamma bu nima ekani va nima uchunligini tushunadi. Bu qanday ishlashini allaqachon hamma ko‘rdi”.

Zelenskiy bu tashabbus faqat Ukrainaning dengiz hududini himoya qilishga qaratilganini ta’kidlab, “biz birovnikiga da’vo qilmaymiz” dedi.

Rossiya 10-oktabrdan buyon Ukraina shaharlari va infratuzilmasiga asosan dronlar bilan zarba bermoqda. Bunday zarbalar Qrim ko‘prigidagi portlashdan keyin boshlangan, uni esa, Rossiya hukumati fikricha, Ukraina maxsus xizmatlari uyushtirgan. 31-oktabr kuni Kiyevda ketma-ket portlashlar sodir bo‘ldi. O‘sha kuni Kiyev, Xarkov va Zaporojye yangi zarbalarga uchradi.

Ma’lumotlarga ko‘ra, Rossiya Ukrainaga zarba berish uchun Eronda ishlab chiqarilgan dronlardan foydalanmoqda. Dastlab Eron va Rossiya Tehron Moskvaga jangovar dronlar yetkazib berayotganini rad etdi. 5-noyabr kuni Eron tashqi ishlar vaziri Husayn Amir Abdullaxon mamlakat Ukrainada “maxsus operatsiya” boshlanishidan oldin Rossiyaga harbiy dronlar partiyasini topshirganini tan oldi.