6-oktabr kuni erta tongda Rossiya qo‘shinlari Ukraina hukumati nazorati ostidagi Zaporojye shahriga yettita raketa hujumi uyushtirdi. Bu haqda Zaporojye viloyati harbiy boshqarmasi boshlig‘i Aleksandr Starux ma’lum qildi.
Staruxning so‘zlariga ko‘ra, zarbalar nishoni infratuzilma obyektlari bo‘lgan, ammo raketalar ko‘p qavatli turar joy binolariga tushgan. Uylar jiddiy shikastlangan, shaharda yong‘inlar boshlangan.
“Zaporojye shahriga raketa hujumlari oqibatida ikki ayol halok bo‘ldi, yana besh kishi vayronalar ostida qolmoqda”, — dedi Starux.
Tarmoqlarda hodisa joyidagi vayronagarchiliklar aks etgan video va suratlar tarqaldi.
“Suspilne” nashri ma’lumotlariga ko‘ra, Zaporojyega hujum vaqtida jami 10 kishi jabrlangan. Ulardan sakkiz nafari kasalxonaga yotqizilgan. Viloyat hokimligi rahbarining so‘zlariga ko‘ra, shifoxonaga tushganlar orasida uch yoshli qizcha ham bor.
Izoh (0)