“Bino podvalidan parkovka sifatida foydalanish shart bo‘lsin”. Rasul Kusherbayev avtoturargohlar taqchilligi va yo‘llardagi tirbandliklar haqida

“Daryo” internet nashri Toshkent shahri hokimligi qoshidagi Jamoatchilik kengashi bilan birgalikda yangi — “Mahalla. Muammo. Mulohaza” loyihasini boshladi. Ko‘rsatuvning 1-soni mehmoni Rasul Kusherbayev avtoturargohlar, shaharsozlik mavzusidagi muammolar bo‘yicha o‘z fikrlarini bildirib o‘tdi.

Oliy Majlis Qonunchilik palatasi deputatining aytishicha, avtoturargohlar taqchilligi, yo‘llardagi tirbandliklarning oldini olish uchun xorij tajribasidan foydalanish zarur.

Adashmasam, 4-5 yil oldin Qozog‘istonning Ostona shahrida bo‘lganimda diqqatimni tortgani shunday bo‘lgandiki, har bir binoning tag qismi avtomatik ravishda mashinalar uchun turargoh sifatida ishlatilar ekan. Bu savdo majmuasi bo‘ladimi, turar joymi, farqi yo‘q. Deyarli har birining tagida “parkovka” bor edi.

Ba’zi paytlar hayron bo‘lardim ko‘chalar bo‘m-bo‘shligini ko‘rib. “Mashinalar qayerda?” degan savol tug‘ilardi. Yo‘llari unaqa keng emas, lekin avtomashinalar uchun joy bor.

Bundan tashqari, avtoturargoh deganda doimiy ochiq yerni tushunamiz. Yo‘q, bu shart emas. Ko‘p qavatli bino yoki yerning tag qismi ham bo‘lishi mumkin. Lekin bu bizning shaharsozligimizda unchalik ommalashmagan.

Tadbirkorlarga og‘irlik qiladi bu masala. Lekin yangi savdo va xizmat ko‘rsatish obyekti qurmoqchi bo‘lgan shaxsga majburiy talab qo‘yish kerak, fikrimcha. O‘sha, binoning pastki qismidan foydalanish masalasi. “Podval”dan “parkovka” sifatida foydalanish shart bo‘lsin, — deydi Kusherbayev.