Italiya Rossiyada qolishga zarurati bo‘lmagan fuqarolariga zudlik bilan u yerni tark etishni tavsiya qildi. Bu haqda Italiya elchixonasining bayonotiga tayanib, “Izvestiya” xabar berdi.
“Xalqaro maydonda ro‘y berayotgan so‘nggi voqealar hamda Rossiya bilan havo va avtomobil aloqalaridagi qiyinchiliklar ortib borayotgani munosabati bilan Rossiya Federatsiyasidagi vatandoshlarga agar u yerda qolishga zarurat bo‘lmasa, mamlakatni tark etishlari tavsiya etiladi”, — deyiladi elchixona bayonotida.
27-sentabr kuni AQSH elchixonasi o‘z vatandoshlarini Rossiyaga bormaslikka, u yerda yashayotgan yoki sayohat qilayotgan amerikaliklarni “imkoniyat tug‘ilishi bilan” darhol chiqib ketishga chaqirdi.
AQSH elchixonasi aniqlik kiritishicha, idoraning Amerika fuqarolariga yordam ko‘rsatish bo‘yicha imkoniyatlari juda cheklangan, “sharoitlar, shu jumladan, transport imkoniyatlari esa kutilmaganda yanada cheklanib qolishi mumkin”.
Britaniya rasmiylari ham o‘z fuqarolarini zudlik bilan Rossiyani tark etishga chaqirgan.
Izoh (0)