Ukrainaning ozod qilingan hududlaridagi hayot, istilo ostidagi viloyatlarda “referendumlar”. Urushning 214-kunidan fotoreportaj
24-sentabr kuni Dog‘istonda safarbarlikka qarshi ommaviy aksiyalar bo‘lib o‘tdi va ular hibsga olishlar bilan yakunlandi. Rossiya bo‘ylab harbiy komissariatlarga o‘t qo‘yish avj olmoqda. Ukrainaning bosib olingan hududlarida Rossiya tarkibiga kirish bo‘yicha “referendumlar” o‘tkazilmoqda. Bir qator davlatlar hozirdanoq ularning natijalarini tan olmasligini bildirgan. Meduza manbalarining yozishicha, “referendumlar” yakunlangach, safarbarlik yoshidagi erkaklarning Rossiyadan chiqishi taqiqlanadi. Ayni paytda Ukraina Qurolli kuchlari bosib olingan hududlarni ozod etishda davom etmoqda. Ulardagi aholi rus askarlari tashlab ketgan dala istehkomlarini buzib, yog‘ochlarini o‘tin uchun tashimoqda: oylab davom etgan ishg‘ol va o‘qqa tutishlardan keyin shaharlarda na elektr, na gaz bor. Meduza urushning 214-kuniga oid asosiy fotosuratlarni taqdim etdi.
Ukraina Qurolli Kuchlarining yarador askarlarini evakuatsiya qilish
Ukraina Qurolli Kuchlari askarlari yarador safdoshini tez yordam mashinasiga ortmoqda. Bundan avvalroq ularning otryadi Donetsk viloyati, Limanskiy tumani Shurovo qishlog‘ini ozod qilgan, u yerda Ukraina qarshi hujumni davom ettirmoqda.Foto: AP Photo
Yarador ukrainalik askar safdoshlarining ko‘magi bilan Shurovo qishlog‘iga tibbiy yordam uchun ketmoqda.Foto: AP Photo
“Dnepr-1” maxsus maqsadli patrul polkining askarlari Severskiy Donets daryosidan o‘tib, ozod qilingan Shurovo qishlog‘iga kelmoqda.Foto: AP Photo
Ukrainaning ozod qilingan hududlari
Izyumdagi vayron bo‘lgan maktabning sport zali. Shahar 11-sentabr kuni Ukraina Qurolli kuchlari tomonidan ozod qilingan. Deyarli olti oy davom etgan ishg‘ol va janglar davomida shahar otishmalardan katta zarar ko‘rgan.Foto: AFP
Ukrainalik harbiylar ozod qilingan Izyumda Severskiy Donets daryosidan o‘tuvchi vayron qilingan ko‘prikni ko‘zdan kechirmoqda.Foto: AFP
Rossiya kuchlari Izyumdan chekinayotgan paytda tashlab ketilgan zirhli texnikalar.Foto: AFP
Izyumlik kishi rossiyaliklar tashlab ketgan dala istehkomining yog‘ochlarini o‘tin uchun tashib ketmoqda. Yaqinda rus bosqinidan ozod qilingan shaharda elektr, suv va gaz yo‘q.Foto: Reuters
Mahalliy aholi o‘tin uchun Izyum yaqinida tashlab ketilgan rus istehkomlarini buzmoqda.Foto: Reuters
Okkupatsiya qilingan hududlarda “referendum”
Rossiya nazoratidagi Mariupolda saylov uchastkasiga kiraverishda turgan qurolli askar. Rossiya tarkibiga qo‘shilish bo‘yicha “referendum” 23—27-sentabr kunlari qisman bosib olingan Donetsk, Lugansk, Zaporojye va Xerson viloyatlarida bo‘lib o‘tmoqda. Bir qator davlatlar allaqachon ularning natijalarini tan olmasligni bildirgan.Foto: EPA
Mariupolda ayol o‘zini o‘zi respublika deb e’lon qilgan DXRning Rossiyaga kirishi bo‘yicha “referendum” plakatini ko‘tarib kelmoqda.Foto: “TASS”
Ishg‘ol qilingan Volnovaxadagi odamlar sayyor “saylov uchastkasi”da ovoz bermoqda.Foto: “TASS”
Rossiyadagi safarbarlik
Moskva shahrining Kuntsevskiy tumani harbiy xizmatga chaqiruv kommissariatida xizmatga chaqirilganlarning qarindoshlari. 21-sentabr kuni prezident Putin qisman safarbarlik to‘g‘risidagi farmonni imzoladi. Biroq, guvohlarning xabar qilishicha, ko‘plab harbiy komissariatlar buni iloji boricha kengroq talqin qilmoqda hamda yoshi va armiyadagi tajribasidan qat’i nazar, hammani harbiy xizmatga jalb qilishga urinmoqda. Bunga javoban Rossiyaning bir qator mintaqalarida harbiy komissariatlarga o‘t qo‘yish va safarbarlikka qarshi ommaviy norozilik namoyishlari boshlandi.Foto: “TASS”
