Namangan va Samarqandda “Regapen” psixotrop moddalarini sotayotgan shaxslar ushlandi
Namangan va Samarqand viloyatlarida Kuchli ta’sir qiluvchi dori vositalarini muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departament hamda DXXning Namangan viloyati boshqarmalari tomonidan tezkor tadbir o‘tkazilgan. Unda fuqarolar A.A., B.T. va R.S. o‘zaro til biriktirib, tarkibida kuchli ta’sir qiluvchi moddalar mavjud bo‘lgan 1 316 dona “Regapen” nomli dori vositalarini fuqaro O‘.ga 32,9 million so‘mga sotgan vaqtida ashyoviy dalil bilan ushlangan.
Shuningdek, Samarqand viloyat boshqarmasi hamda Kattaqo‘rg‘on tuman bo‘limi tomonidan tezkor tadbir o‘tkazilgan. Unda fuqaro S.S. boshqa bir fuqaro E.ga jami 56 dona “Regapen” nomli kuchli ta’sir qiluvchi dori vositalarini 1,5 million so‘mga sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
