Avstraliyada 230 ta kit sohilga chiqarib tashlangan holda topildi (video)

Avstraliyaning Tasmaniya oroli g‘arbiy sohilida 230 ga yaqin kit topildi.

Tasmaniya tabiiy resurslar va atrof-muhit departamenti ma’lumotlariga ko‘ra, Oushin-bich sohiliga chiqarib tashlangan jonivorlar ko‘rinishidan uchuvchi kitlar turiga kiradi, ularning kamida yarmi hali tirik ekani aytilmoqda.

“Dengizni muhofaza qilish dasturi” guruhi kitlarni qutqarish uchun asbob-uskunalarni yig‘ib, hududga yo‘l oldi”, — deyiladi departamentda.

Mahalliy aholi vakillaridan biri Avstraliya radioeshittirish korporatsiyasiga Makkuori bandargohiga kiraverishda kitlarni ko‘rganini aytgan. Mahalliy hokimiyat odamlarni bu joylardan uzoqroq turishga chaqirdi.

19-sentabr kuni Melburn va Tasmaniya shimoliy qirg‘og‘i o‘rtasidagi Bass bo‘g‘ozida joylashgan Qirol orolida 14 ta kashalot topilgan edi.