O‘zbekistonda yilning dastlabki ikki oyida tez yordamga mingga yaqin yolg‘on chaqiriq kelib tushgan

Sog‘liqni saqlash vazirligining ma’lum qilishicha, 2022-yilning yanvar–fevral oylarida Respublika tez tibbiy yordam xizmatiga kelib tushgan 31 296 ta murojaat asossiz deb baholangan bo‘lib, ularning 922 tasi yolg‘on chaqiriq bo‘lgan.

“Barchamiz issiq jonmiz. Vaqt-bevaqt tobimiz qochib qolsa, darrov tez yordamga murojaat qilamiz. Ammo ba’zida 103 xizmati xodimlarining belgilangan manzilga o‘z vaqtida yetib bora olmaslik holatlari kuzatiladi. Bunga esa ko‘pincha asossiz va yolg‘on chaqiriqlar sabab bo‘ladi”, — deyiladi vazirlik xabarida.

SSV 922 tasi yolg‘on chaqiriq 2021-yilning shu davriga nisbatan qariyb 18 ta kam ko‘rsatkich bo‘lsa-da, bunday murojaatlar sababli insonlar hayoti xavf ostida qolishini inobatga olsa, ularning bittasi ham ko‘pligini qayd etgan.

Eng ko‘p yolg‘on chaqiriq Toshkent viloyatida qayd etilgan — 258 ta. Qashqadaryo viloyatida 124 ta, Farg‘ona viloyatida 119 ta, Toshkent shahrida 107 ta, Navoiy viloyatida esa 102 ta shunday murojaat kelib tushgan.

Eng kam yolg‘on chaqiriq Jizzax viloyati (2 ta), Qoraqalpog‘iston Respublikasi (11 ta) va Sirdaryo viloyatida (15 ta) qayd etilgan.

Bundan tashqari, yanvar—fevral oylarida tez yordam xodimlari tomonidan yana bir qancha murojaat natijasiz chaqiriq, deb baholangan. Jumladan, 1401 ta holatda manzil topilmagan, 11 ming 692 ta vaziyatda tez tibbiy yordam rad etilgan, 2 598 ta holatda bemor o‘z joyida bo‘lmagan, 5 692 tasida boshqa transport vositasida olib ketilgan, 339 tasida esa tez yordam xodimlariga eshik ochilmagan.

Ma’lumot uchun, 2021-yilda O‘zbekistonda tez yordam xizmatiga jami 194 96 ta asossiz chaqiriq kelib tushgan.