Oliy Majlis Senatining 24-yalpi majlisi bo‘lib o‘tmoqda. Yig‘ilishda tashqi ishlar vaziri Abdulaziz Komilov Ukraina atrofida bo‘layotgan mojaro yuzasidan O‘zbekiston pozitsiyasini aytdi. Bu haqda “Daryo” muxbiri xabar berdi.
Xalqaro hamjamiyat e’tibori Rossiya—Ukraina voqealarga qaratilgan. Bunga biz o‘z manfaatlarimizdan kelib chiqib munosabat bildiramiz.Eslatib o‘tamiz, O‘zbekiston Ukraina va Rossiya atrofidagi vaziyat bo‘yicha “vazmin, neytral pozitsiyada”. “Mamlakatimiz azaldan ham Rossiya, ham Ukraina bilan yaqin, do‘stona munosabatlarga ega. Biz keng mintaqamizda tinchlik, barqarorlik va izchil taraqqiyot bo‘lishidan manfaatdormiz. Barcha bahs va kelishmovchiliklar faqatgina xalqaro huquq normalari asosida hal qilinishi lozim”, — degan prezident matbuot kotibi Sherzod Asadov Mirziyoyev va Putin o‘rtasidagi telefon muloqoti yuzasidan ma’lumot berib.O‘zbekistonning Ukraina atrofidagi voqealarga munosabati quyidagicha:
Ukraina atrofidagi vaziyat O‘zbekistonda jiddiy xavotir uyg‘otmoqda. Biz bu masalaning tinch yo‘l bilan hal qilinishi tarafdorimiz. Buning uchun birinchi navbatda harbiy harakatlar, zo‘ravonliklar zudlik bilan to‘xtatilishi zarur. Hozirgi voqealar bo‘yicha munosabatimiz shuki, O‘zbekiston tarixan Rossiya va Ukraina bilan an’anaviy, ko‘pqirrali hamkorlikka ega. Biz bu mamlakatlar bilan o‘z manfaatlarimizdan kelib chiqib hamkorlik qilamiz. Bir tomondan Rossiya bilan keng, ko‘p qamrovli hamkormiz. Ikkinchi tomondan Ukraina bilan ham keng ko‘lamli hamkorlik amalga oshirilmoqda.
Masalan, 2021-yilda Ukraina bilan savdo aylanmasi hajmi 704 million AQSH dollariga yetdi. Bu 2020-yilga nisbatan 60 foizga yuqori ko‘rsatkich.
Joriy yilda ham Toshkent va Ukrainada bir qator tadbirlar o‘tkazmoqchi edik. Mojarodan oldin Toshkent—Kiyev yo‘nalishida haftada 4 tadan aviaqatnovlar amalga oshirilayotgandi.
Biz, albatta, holatdan kelib chiqib Ukrainaga gumanitar yordam beramiz. O‘zbekiston Ukraina mustaqilligi, suvereniteti va hududiy yaxlitligini tan oladi. Biz Lugansk va Donetsk mustaqilligini tan olmaymiz. O‘zbekiston pozitsiyasi shuki, mamlakatimiz hech qanday xalqaro harbiy blokka qo‘shilmaydi.
Abdulaziz Komilov
Avvalroq tashqi ishlar vaziri Abdulaziz Komilov Turkiyaning ANews telekanaliga bergan intervyusida Ukrainadagi vaziyat yuzasidan ham o‘z fikrlarini bildirib o‘tgan.
“Biz juda xavotirdamiz. Bu haqda ko‘p gapirishimiz mumkin. Ammo dunyodagi aksariyat odamlar kabi biz ham kuch ishlatish to‘xtatilishini va barcha muammolar siyosiy-diplomatik yo‘llar bilan hal qilinishini xohlaymiz”, — degan u.
Izoh (0)