O‘zbekistonda yengil avtomobillar ishlab chiqarish 1996-yilda Andijon viloyatida yo‘lga qo‘yilgan. Asaka shahrida ochilgan zavodda dastlab Damas, Tico va Nexia rusumli mashinalar dunyo yuzini ko‘rgan. “Daryo” muxbiri Toshkent politexnika muzeyida bo‘lib, O‘zbekistonda ishlab chiqarilgan avtomobillar tarixi haqida fotoreportaj tayyorladi.
Daewoo Nexia — dastlabki o‘zbek yengil avtomobillaridan biri
Avtomobil taqdimotida (1996-yil) O‘zbekistonning birinchi prezidenti Islom Karimov ham ishtirok etgan. Prezident old kapotiga o‘z imzosini qo‘ygan Nexia muzeydan Islom Karimov nomidagi muzeyga olib ketilgani aytildi. “Daryo” matreial tayyorlash mobaynida Nexia-1 hozirda aynan qayerda saqlanayotganini aniqlay olmadi.
Necha yildirki, Nexia aktualligini yo‘qotmay kelmoqda. Ichki va tashqi bozorda unga bo‘lgan talab hamon yuqori. Yangi versiyadagi Nexia-2 ni ishlab chiqarish 2008-yilning iyun oyidan boshlangan.
Birinchi o‘zbek avtomobillaridan biri – Daewoo Damas
Damas yuqori bo‘lmagan narxi, yuk va yo‘lovchi tashishga mo‘ljallangani bilan ko‘pchilikka ma’qul bo‘lib keladi. Sakkiz o‘rindiqli mashina avval Daewoo brendi (Damas-1) ostida ishlab chiqarilgan, hozirda esa Chevrolet brendi ostida ishlab chiqarilmoqda.
Muzeyda turgan Damas-1 konveyrdan chiqqan birinchi avto emas, balki tez yordam xizmatida ishlatilgan avtomashina hisoblanadi. U muzeyga keyinchalik olib kelib qo‘yilgan. Muzey xodimlarining aytishicha, birinchi chiqqan Damas-1 qayerda saqlanayotgani noma’lum.
Daewoo Tico — kichik oila uchun mo‘ljallangan to‘rt o‘rinli xetchbek
Avtomobil 1996-yilning mayida ishlab chiqarila boshlandi. 2003-yilning fevral oyida Tico avtomobili UzDaewooAuto qo‘shma korxonasining konveyeridan chiqdi. Keyinchalik u yangi Matiz modeli bilan almashdi.
Tico’ga o‘rinbosar — Matiz
Dastlabki Matiz’ni sinovdan o‘tkazish jarayonida Islom Karimovning shaxsan o‘zi ishtirok etgan. Davlat rahbari Matiz’ning old (yo‘lovchi) o‘rindig‘ida o‘tirib, avtomobil harakatlanishini kuzatgan. Ishlab chiqarilgan birinchi Matiz’ga davlat rahbari imzo qo‘ygan. Imzolash jarayonidagi surat va o‘sha mashina muzeyda saqlanmoqda. Matiz 2001-yildan 2017-yilgacha ishlab chiqarilgan. U yoqilg‘i sarfi kamligi va ixchamligi uchun xaridorgir bo‘lgan.
O‘zbekistonda Lacetti ishlab chiqarish 2003-yildan yo‘lga qo‘yildi
Lacetti kuzovining dizayni mashhur Pininfarina avtomobil atelyesi (Italiya) mehnatining mahsuli ekani ma’lum. Bodomnusxa old chiroqlar va uzun ravon chiziqlar e’tibor tortadi. U yuqori sifat, qo‘shimcha funksiyalar va ajoyib boshqaruvni o‘zida mujassam etgan.
2010-yildan Chevrolet Spark avtomobili ishlab chiqarila boshlandi
Spark rusumidagi dastlabki o‘zbek avtomobiliga ham prezident Islom Karimov imzo qo‘ygan va mashina muzeyda saqlanmoqda. Spark — GM Uzbekistan konveyeridan chiqqan yettinchi model hisoblanadi. Avtomobil turli mamlakatlar yetakchi dizaynerlari ijodiy ishlanmalari hosilasi bo‘lib, ikki qavatli radiator panjarasi, ko‘zga yaqqol tashlanadigan tashqi ko‘rinishi bilan e’tiborni tortadi. Bundan tashqari, avtomobil o‘zining ixchamligi va yuqori manyovrga egaligi bilan shahar ko‘chalaridagi serqatnov transport oqimiga bemalol “singib” keta oladi.
O‘zbekistonda 2013-yildan Chevrolet Cobalt ishlab chiqarila boshlandi
Avtomobil shinamlik, nafosat va jo‘shqinlik sifatlarini, dizayn sohasining eskirmaydigan, mumtoz an’analarini o‘zida mujassamlagan. Xavfsizlikni yuqori darajada ta’minlash maqsadida avtomobil mustahkam po‘latdan ishlanib, haydovchi va old o‘rindiqdagi yo‘lovchi uchun xavfsizlik yostiqchalari bilan jihozlangan.
Ma’lumot uchun, O‘zbekistonda 2007-yilda Chevrolet Captiva va Chevrolet Epica, 2008-yilda Chevrolet Tacuma, 2012-yildan Chevrolet Malibu, Chevrolet Orlando, 2013-yilda Gentra avtomobillarini ishlab chiqarish yo‘lga qo‘yilgan. 2016-yildan Chevrolet Nexia, 2018-yildan Chevrolet Tracker, 2019-yildan Chevrolet TrailBlazer, Chevrolet Equinox, Chevrolet Traverse avtomobillari ishlab chiqarila boshlangan.
Hozirgi paytda UzAutoMotors AJ tomonidan Chevrolet va Ravon brendlari ostida – Spark (R2), Nexia (R3), Cobalt (R4), Lacetti (Gentra), Damas, Labo, Malibu, Tracker, Equinox, Trailblazer, Traverse va Tahoe kabi avtomobil modellari xaridorlarga yetkazib berilmoqda.
Izoh (0)