UzAutoMotors kompaniyasi 3-martdan boshlab yangilangan Chevrolet Traverse va Chevrolet Tahoe’ning 2022-yilgi modellari uchun shartnoma tuzishni boshladi.
Chevrolet Tahoe 2022
Uzunligi besh metrdan oshiq bo‘lgan avtomobil zamonaviy 5,3 litrli dvigatel hamda 10 pog‘onali avtomatik uzatmalar qutisi bilan jihozlangan. Chevrolet Tahoe dvigateli 343 ot kuchiga ega bo‘lib, 512 Nm maksimal aylanish momenti 8 soniyada 100 kilometr/soatgacha tezlanish imkonini beradi.
Chevrolet Tahoe Magnetic Air Ride Control pnevmatik osma tizim bilan jihozlangan. Avtomobil har qanday sharoitda qo‘llanilishidan qat’i nazar qulay harakatlanishni ta’minlaydi. Avtomatik kruiz-kontrol tizimi avtomobilni harakatlanish qatorida ushlab turib, doimiy barqarorligini ta’minlaydi hamda to‘satdan to‘siq paydo bo‘lganda avtomatik tarzda tormoz tizimini faollashtiradi.
Yangi Chevrolet Tahoe 10,2 dyuymli sensorli axborot-ko‘ngilochar ekraniga ega. Shuningdek, unga 9 ta kalonkadan iborat premium Bose dinamiklari ulangan. Ekranda avtomobil holatini 360 gradusda ko‘rish mumkin. Mazkur modelning narxi:
- Boshlang‘ich komplektatsiya: 597 687 427 so‘mdan.
- RST AT MY22 komplektatsiya: 947 499 999 so‘m.
Traverse 3,6 litrli V6 dvigateli 318 ot kuchiga ega bo‘lib, 7.6 soniyada 100 kilometr/soatgacha tezlanish bilan avtomobilni qulay boshqarishni hamda yoqilg‘i tejamkorligini ta’minlaydi. Yetti o‘rindiqli avtomobil qulaylik uchun eng so‘nggi funksiyalar bilan birga ko‘ngilochar hamda xavfsizlik bo‘yicha eng ilg‘or texnologiyalarni taklif etadi.
Rangli 8 dyumli sensor ekran 10 ta kalonkadan iborat premium Bose dinamikli multimedia tizimiga ega. Mazkur modelning narxi:- Boshlang‘ich komplektatsiya: 469 211 034 so‘mdan.
- Premiyer AT MY22 komplektatsiya: 647 600 000 so‘m.
“Boshlang‘ich komplektatsiyali avtomobilni sotib olish istagida bo‘lgan xaridorlar, kompaniyaning rasmiy dilerlarida ariza qoldirishi yoki rasmiy sayti info@uzautomotors.com orqali onlayn tarzda ariza yuborishi mumkin. To‘plangan arizalarning soniga qarab, kompaniya ushbu avtomobilning yetkazilib berilishini ta’minlaydi”, — deyiladi xabarda.
Avvalroq Shavkat Mirziyoyev yig‘ilishda Vazirlar Mahkamasiga uch kun ichida avtomashinalar importi uchun bojxona to‘lovlarini 2 barobarga kamaytirish, avtomobillar narxini 5 foizga arzonlashtirish, mahalliylashtirish darajasini 48 foizdan 56 foizgacha oshirish bo‘yicha qaror loyihasini ishlab chiqish topshirig‘ini bergandi. Shuningdek, prezident 1-mayga qadar avtomobil sotib olishdagi navbatlarni to‘liq bartaraf etish, UzAuto Motors avtomobillari uchun oldindan to‘lovni 85 foizdan 50 foizga kamaytirish vazifasini ham qo‘ygan.