O‘zbekiston 2021-yilda qovun-tarvuz eksportidan 22 mln dollardan ortiq daromad qildi

O‘zbekiston 2021-yilda xorijga qiymati 22,7 million dollarga teng 82,9 ming tonna qovun va tarvuz eksport qilgan. Bu haqda Davlat statistika qo‘mitasi xabar qildi.

Qayd etilishicha, shu yili mamlakatda yetishtirilgan qovun va tarvuzlar 23 ta xorijiy davlatlar bozorlariga yetkazib berilgan. Eksport hajmi 2020-yil bilan solishtirganda 22,7 ming tonnaga kamaygan.

2021-yil mobaynida O‘zbekiston eng ko‘p qovun va tarvuz eksport qilgan davlat Qozog‘iston hisoblanadi — 33,6 ming tonna. Uchlikni Rossiya (20,3 ming tonna) va Qirg‘iziston (15,6 ming tonna) yakunlagan. Keyingi o‘rinlar quyidagicha tartiblangan:

• Ukraina – 5,6 ming tonna;
• Latviya – 2,9 ming tonna;
• Belarus – 1,4 ming tonna;
• Tojikiston – 1,4 ming tonna;
• Germaniya – 1,2 ming tonna.