O‘zbekistonda so‘nggi besh yilda jazoni ijro etish muassasalaridan birorta ham mahkum qochmagan. Bu haqda Ichki ishlar vazirligi huzuridagi Jazoni ijro etish departamentiga tayanib, O‘zA xabar berdi.

Foto: “Daryo” / Madina Nurman

Ma’lum qilinishicha, hozirda O‘zbekistonda 54 ta jazoni ijro etish koloniyasi mavjud bo‘lsa, shundan 18 tasi yopiq turdagi, 25 tasi manzil koloniya va 11 tasi tergov hibsxonalari hisoblanadi. O‘sha 18 ta yopiq turdagi koloniyaga ruxsatsiz kirish ham, chiqish ham mumkin emas va ular qat’iy qo‘riqlanadi. “Ularni tom ma’nodagi qamoq deb atash mumkin va bu muassasalardan hech kim qochmagan”, — deyiladi xabarda.

Ta’kidlanishicha, ayni paytda jazoni ijro etish tizimida 29 mingdan ortiq, shundan 7 mingdan ortig‘i manzil koloniyada, 22 mingdan ortiq mahkumlar boshqa turdagi koloniyalarda jazo muddatini o‘tamoqda.

Jinoyat ijroiya kodeksiga ko‘ra, jazoni ijro etish muassasalari jumlasiga jazoni ijro etish koloniyalari, shu jumladan, davolash huquqi asosidagi koloniyalar, tarbiya koloniyalari, turmalar, mahkumlar uchun ixtisoslashgan kasalxonalar kiradi.

Tergov hibsxonalari ozodlikdan mahrum etishga hukm qilingan va xo‘jalik xizmatiga oid ishlarni bajarish uchun qoldirilgan shaxslarga nisbatan jazoni ijro etish muassasalari vazifasini bajaradi. O‘z navbatida jazoni ijro etish koloniyalari manzil-koloniyalarga, umumiy, qattiq, maxsus tartibli koloniyalarga bo‘linadi hamda voyaga yetgan mahkumlarni saqlash uchun mo‘ljallangan.

Tarbiya koloniyalari esa voyaga yetmagan mahkumlarni saqlash uchun mo‘ljallangan.

Eslatib o‘tamiz, 2020-yilning yanvarida Toshkent shahar IIBB “Panelniy” qamoqxonasidagi sharoitlar xalqaro standartlarga javob berishini ma’lum qilgandi. AQShning Xalqaro diniy erkinlik masalalari bo‘yicha komissiyasi 2021-yilning oktabrida O‘zbekistondagi diniy va siyosiy mahbuslar haqida hisobotini e’lon qilgandi. Hisobotda ta’kidlanishicha, mamlakatda prezident o‘zgargan 2016-yil oxiridan beri minglab mahbuslar ozod etilganiga qaramay, 2000 dan ziyod odam konstitutsiyaviy tuzumga tajovuz qilish, taqiqlangan adabiyotlarni saqlash yoki taqiqlangan guruhlarga a’zo bo‘lish kabi “mujmal va haddan tashqari keng talqin qilish mumkin bo‘lgan ayblovlar” bilan qamoqda qolmoqda.