Prezident Shavkat Mirziyoyev raisligida 20-yanvar kuni davlat mulkini xususiylashtirish bo‘yicha 2022-yilda amalga oshiriladigan ishlar yuzasidan videoselektor yig‘ilishi o‘tkazilgani to‘g‘risida xabar berilgandi. Yig‘ilishda qator obyektlarni to‘liq xatlovdan o‘tkazib, ularni xususiylashtirish bo‘yicha taklif kiritish topshirildi, deb xabar beradi davlat rahbarining matbuot xizmati.
Ma’lum qilinishicha, davlat rahbarining topshirig‘i bilan o‘tkazilgan xatlov natijalariga ko‘ra, tarmoq va hududlarda samarasiz ishlatilayotgan 2 mingta obyekt borligi aniqlangan. Jumladan, neft-gaz tarmog‘ida 210 ta, aloqa sohasi korxonalarida 152 ta, davlat tijorat banklarida 114 ta, kimyo tarmog‘ida 44 ta, energetikada 28 ta sotiladigan bino bor. Viloyat hokimliklari balansida ham 170 ga yaqin bo‘sh obyekt yillar davomida sotilmay turibdi.
Yig‘ilishda bu borada sustkashlikka yo‘l qo‘ygan rahbarlarga intizomiy choralar ko‘rilishi belgilangan, ayrimlari egallab turgan lavozimidan ozod etilgan. 2022-yilda sohadagi ishlarni faollashtirib, natijadorlikni ikki barobar oshirish zarurligi ta’kidlangan.
Masalan, hududiy obyektlar va noqishloq yerlarni xususiylashtirish orqali yil yakunigacha jami 8 trillion so‘mdan ziyod tushumni ta’minlash mumkin. Shu bilan birga, xatlovni davom ettirish zarurligi ko‘rsatib o‘tilgan. Nosohaviy, samarasiz va bo‘sh turgan aktivlarni aniqlash hamda ochiq savdolarga chiqarishga viloyat hokimlari va tarmoq rahbarlari shaxsan mas’ul etib belgilangan.
Bugungacha savdoga qo‘yilgan 33 mingta yer uchastkasini mulk huquqi asosida sotish, shuningdek, 1-iyulga qadar yana 25 mingta maydonni auksionga chiqarish vazifasi qo‘yilgan.
Yo‘l, transport, neft-gaz, energetika, avtomobilsozlik tarmoqlariga qarashli 266 ta korxonani alohida yondashuv asosida savdoga chiqarish kerakligi aytilgan.
“Hali ko‘plab tarmoq rahbarlari tizimidagi nosohaviy korxonalarni samarasiz ishlatmoqda. Yirik tarmoqlarda 480 ta korxonadagi davlat ulushini to‘liq xususiy sektorga berish mumkin”, – deydi Shavkat Mirziyoyev.
“Farg‘onaazot”, “Bektemir spirt zavodi”, “Qo‘qon biokimyo”, “Dehqonobod kaliy zavodi”, “Kvars”, “Xayyat” kabi yirik majmualarga salohiyatli investorlarni jalb qilish muhimligi qayd etildi. 23 ta aksiyadorlik jamiyatining aksiyalarini birlamchi sotish orqali fond bozoriga chiqarish bo‘yicha ko‘rsatmalar berilgan.
Bo‘sh turgan binolardan foydalanishning yana bir usuli – ijara. Yig‘ilishda bu boradagi imkoniyatlar ham ko‘rsatib o‘tilgan. Hududlar va tarmoqlar tasarrufidagi davlat mulklari ijarasi hisobiga 2022-yilda 500 milliard so‘m tushumni ta’minlash mumkinligi aytilgan.
Shuningdek, bundan buyon, uch oydan ortiq bo‘sh turgan obyekt ijaraga berilishi yoki sotuvga chiqarilishi shartligi belgilangan. Davlat aktivlari agentligiga davlat ulushi bor korxonalarning ijara shartnomalarini ochiq-oshkora ro‘yxatga olish va onlayn nazorat qilish tizimini yo‘lga qo‘yish bo‘yicha topshiriq berilgan. Yig‘ilishda belgilangan vazifalardan kelib chiqib, hududlar va tarmoqlar kesimida 2022-yil xususiylashtirish dasturi tasdiqlanadi.
Avvalroq Shavkat Mirziyoyev Sirdaryo viloyati hokimi G‘ofur Mirzayev va Xorazm viloyati hokimi Farhod Ermanovga xususiylashtirish ishlarini sust tashkil etgani uchun hayfsan e’lon qilingandi.
Izoh (0)