O‘zbekistonda so‘nggi kunlarda sodir bo‘lgani xabar qilingan yo‘l-transport hodisalari haqida batafsil ma’lumot beramiz.

Jizzaxda ikki Nexia to‘qnashdi.

Jizzax viloyati Zomin tumani “Sharof Rashidov” mahalla fuqarolar yig‘ini hududidan o‘tgan Dashtobod–Zomin 4R-40 yo‘lining 20-kilometrida yo‘l-transport hodisasi ro‘y berdi.

“Sharof Rashidov” mahalla fuqarolar yig‘inida yashovchi shaxs boshqaruvidagi Nexia bilan o‘zidan oldinda harakatlanayotgan va orqaga qayrilish uchun to‘xtagan, mahalladoshi boshqaruvidagi Nexia’ning orqasidan urgan.

Oqibatda oldindagi avtoulov egasining (2020-yilda tug‘ilgan) voqea yuz bergan paytda avtomashina ichida bo‘lgan o‘g‘li bosh miya yopiq jarohati, bosh miya chayqalishi va peshona sohasi teri osti gematomasi tashxisi bilan shifoxonaga yotqizilgan.

Holat yuzasidan tergovga qadar tekshiruv o‘tkazilmoqda.

Yangihayot tumanida Spark piyodani urib yubordi.

2021-yilning 19-noyabr kuni soat 01:00 larda Toshkent shahri, Yangihayot tumani, Binokor ko‘chasi 2-darajali yo‘lda haydovchi, S.N. (1991-yilda tug‘ilgan) Spark avtomobilini boshqarayotib, ushbu ko‘chadan yo‘lning belgilanmagan joyidan kesib o‘tayotgan piyoda, T.Z.ni (1995-yilda tug‘ilgan) urib yuborgan.

Oqibatda piyoda T.Z. tan jarohati olib shifoxonaga yotqizilgan.

Mazkur YTH yuzasidan Toshkent shahar IIBB huzuridagi TB tomonidan surishtiruv harakatlari olib borilmoqda

Samarqandda haydovchisi uxlab qolgan Nexia beton to‘siqqa urildi.

2021-yilning 17-noyabr kuni tunda Samarqand shahrining Amir Temur ko‘chasida haydovchi Nexia avtomobil rulida uxlab qolib, boshqaruvni yo‘qotgan.

Oqibatda mashina yo‘l chetidagi beton to‘siqqa zarb bilan urilgan va haydovchi olgan tan jarohati tufayli voqea joyida halok bo‘lgan.