Qarshida YPX Lacetti’si va Nexia to‘qnashdi, Namanganda Malibu yonib ketdi. So‘nggi kunlarda yo‘llarda sodir bo‘lgan voqealar tafsiloti

O‘zbekiston yo‘llarida so‘nggi kunlarda sodir bo‘lgan hodisalar haqida batafsil ma’lumot taqdim etamiz.

Qarshida YPX avtomobili va Nexia to‘qnashdi

2021-yilning 13-noyabr kuni soat 09:25 larda Qashqadaryo viloyati, Qarshi shahri, Mustaqillik ko‘chasida YPX xodimi Q.Baxromovga biriktirilgan Lacetti rusumli xizmat avtomobili hamda haydovchi D.X. boshqaruvidagi Nexia rusumli avtomobil ishtirokida to‘qnashuv sodir bo‘lgan.

YTH natijasida tan jarohati olgan fuqarolar yo‘q.

Mazkur YTH yuzasidan Qarshi shahar prokuraturasi tomonidan tergovga qadar surishtiruv harakatlari olib borilmoqda.

Chirchiqdagi chorrahada Damas va Lacetti YTH sodir etdi

2021-yilning 10-noyabr kuni soat 18:00 larda Toshkent viloyati, Chirchiq shahar, Kangli va X.Maqsudov ko‘chalari kesishgan chorrahada haydovchi, 1997-yilda tug‘ilgan J.M. boshqaruvidagi Damas rusumli hamda haydovchi, 1987-yilda tug‘ilgan B.D. boshqaruvidagi Lacetti rusumli avtomobillar ishtirokida to‘qnashuv sodir bo‘lgan.

YTH natijasida tan jarohati olgan fuqarolar yo‘q. Transport vositalariga zarar yetgan.

Mazkur YTH yuzasidan Chirchiq shahar IIB YHXB xodimlari tomonidan surishtiruv harakatlari olib borilmoqda.

Namanganda Malibu yonib ketdi

Namangan shahri Davlatobod tumanida 13-noyabr kuni Malibu avtomashinasi yonib ketdi.

Ma’lum qilinishicha, tumanning “Yuksalish” mahalla fuqarolar yig‘ini, Yoshlar ko‘chasida joylashgan avtoturargohda turgan Malibu avtomashinasida yong‘in sodir bo‘lgan. Qayd etilishicha, hodisa qutqaruvchilar tomonidan bartaraf etilgan.

Oqibatda mashinaning salon qismi to‘liq, motor hamda ustki qismi qisman yonib zararlangan. Hozirda sodir bo‘lgan yong‘in yuzasidan tergovga qadar surushtiruv ishlari olib borilmoqda.