Қашқадарё вилоятининг Косон туманида катта тезликда ҳаракатланган Lacetti қурилиш ишлари олиб борилаётган кўприкдан қулаб тушди. Бу ҳақда «Севимли» телеканалининг «Замон» информацион дастурида хабар берилди.
Маълум бўлишича, воқеа 8 октябрь куни соат 2:00 ларда давлат аҳамиятига эга бўлган 4Р-95 Косон—Шўрбозор автомобиль йўлининг Косон тумани Ушоқтепа қишлоғидан ўтган 8-километрида содир бўлган. Зовур устида 1980 йилда қурилган кўприкни 1 сентябрдан буён қайта қуриш ишлари олиб борилаётган бўлган.
Lacetti ҳайдовчиси ҳаракатланиб келаётиб, Ушоқтепа қишлоғи ҳудудида таъмирлаш ишлари олиб борилаётган кўприкдан пастга тушиб кетган. Оқибатда ҳайдовчи оғир тан жароҳатлари олиб, воқеа жойида вафот этган.
Ҳозирда ҳодиса юзасидан Косон тумани ИИБ ҳузуридаги тергов бўлими томонидан терговга қадар суриштирув ишлари олиб борилмоқда.
Бундан аввал Қашқадарё вилоятининг Деҳқонобод туманида ҳаракатланиб кетаётган Nexia бошқарувни йўқотиб, 15 метр чуқурликдаги жарликка қулаб тушгани ҳақида хабар берилган эди. Ҳайдовчи ЙТҲда омон қолган.
Изоҳ (0)