Toshkentda muzeyda turgan salkam 70 yillik “Pobeda” kabrioleti 90 ming dollarga sotuvga qo‘yildi. Lekin u muzeyning mulki emas

Sentyabr oyida “Olx.uz” e’lonlar saytida bir qator retro avtomobillar sotilishi haqida e’lonlar paydo bo‘ldi. Unda, jumladan, 1964-yilda ishlab chiqarilgan GAZ-69 yo‘ltanlamasi 15 ming dollarga, 1962-yilda ishlab chiqarilgan “Moskvich-407” mashinasi 20 ming dollarga, 1949—1953-yillar oralig‘ida ishlab chiqarilgan GAZ M20 “Pobeda” kabrioleti esa 90 ming dollarga sotuvga qo‘yilganini ko‘rish mumkin.

Retro avtomobillar sotilishi haqidagi turkum e’lonlar soni jami sakkizta bo‘lib, e’tiborga molik tomoni, ularning bari Toshkent politexnika muzeyida olingan. “Daryo” muxbiri vaziyatga oydinlik kiritish maqsadida muzeyda bo‘ldi va muassasaning marketing va turizm bo‘limi boshlig‘i Alisher Sadullayev bilan muloqot qildi. Qayd etish joiz, e’lonlar “Olx.uz”ga aynan ismi-sharifi Alisher Sadullayev bo‘lgan shaxs tomonidan joylashtirilgan.

Alisher Sadullayevning so‘zlariga ko‘ra, Toshkent politexnika muzeyida namoyishga qo‘yilgan avtomobillarning 8 tasi haqiqatan ham sotuvga qo‘yilgan.

“Biz muzey eksponatlarini kengaytirish va shu orqali tashrif buyuruvchilar sonini oshirish maqsadida retro mashinalarning egalaridan o‘z avtomobillarini muzeyga ko‘rgazma uchun joylashtirish taklifi bilan chiqqanmiz. Sotuvga qo‘yilgan noyob mashinalar ham muzey fondiga tegishli emas — shaxsiy kolleksionerdan vaqtincha, ko‘rgazma uchun olingan mashinalardir”, — deya ma’lum qildi Sadullayev.

Uning ta’kidlashicha, bu ishdan ko‘zlangan asosiy maqsad — avtomobil ixlosmandlarini muzeyga ko‘proq jalb qilishdir. “Bu ikki tomonga ham naf keltiradi. Birinchidan, bizning eksponatlarimiz safi kengayadi, ikkinchidan, kolleksionerlar o‘z mashinalarini keng jamoatchilikka namoyish etib, shu orqali ularni sotish imkoniyatiga ega bo‘ladi”, — deydi muzey vakili.

Sa’dullayevning qo‘shimcha qilishicha, tomonlarning o‘zaro kelishuviga ko‘ra avtomashinalarning muzeyda turgan vaqti uchun hech qanday haq to‘lanmaydi, ammo, mabodo shaxsiy kolleksionerga tegishli ushbu retroavtomobillardan birortasi sotilsa, sotuvdan tushgan mablag‘ning 10 foizgacha bo‘lgan miqdori homiylik asosida muzey hisobiga o‘tkazib berilishi ko‘zda tutilgan.

Muloqot davomida mashinalari sotuvga qo‘yilgan kolleksionerlarning shaxsi oshkor etilmadi.

“Daryo” muxbiri vaziyatni o‘rganish maqsadida muzeyda bo‘lgan kuni xususiy kolleksioner hisobidan namoyishga qo‘yilgan retro avtomobillardan biri to‘y xizmati uchun olib ketilgani ma’lum bo‘ldi — muzey vakillari ushbu mashinalardan marosimlarda foydalanish mumkinligini tasdiqladi va bu xizmat haqi “ko‘chadagi narx-navodan past ekani” ta’kidladi.

Toshkent politexnika muzeyi 2015-yil noyabr oyida ishga tushgan bo‘lib, u “Jahon avtomobilsozlik tarixi”, “O‘zbekiston avtomobil sohasi tarixi” va “Interaktiv amaliyot” bo‘limlaridan iborat. Jahon avtomobilsozligi tarixiga bag‘ishlangan bo‘limda XX asrning o‘rtalarida ishlab chiqarilgan Volkswagen “Qo‘ng‘iz”, BMW, sovet avtomobillarining haqiqiy namunalari bilan tanishish mumkin. O‘zbek avtomobilsozligi tarixiga bag‘ishlangan bo‘limda esa Andijondagi avtozavod va Samarqanddagi avtobus zavodi konveyerlaridan chiqqan dastlabki avtomobillar namoyishga qo‘yilgan.

Toshkent politexnika muzeyining “Jahon avtomobilsozlik tarixi” bo‘limidagi ayrim eksponatlar