“Manchester Yunayted” hujumchisi Krishtianu Ronaldu Chempionlar Ligasi doirasida o‘tkazilgan “Yang Boyz”ga qarshi o‘yinda (1:2) bir qator rekordlarni takrorladi. Bundan tashqari, u o‘z natijasini ham yaxshilab oldi.

Foto: Getty Images

Portugaliyalik futbolchi uchun “Yang Boyz”ga qarshi uchrashuv musobaqadagi 177-o‘yin bo‘ldi. U bu borada “Real” sobiq darvozaboni Iker Kasilyasning rekordini takrorladi.

Ronaldu musobaqa doirasida “Manchester Yunayted” tarkibida 53 ta, “Real”da 101 ta, “Yuventus”da esa 23 o‘yin o‘tkazgan.

Foto: Getty Images

36 yoshli futbolchi Shveysariya klubiga qarshi o‘yinda o‘z nomiga gol ham yozdirib qo‘ydi va musobaqadagi gollari sonini 135 ta yetkazib oldi. Bu borada uning eng yaqin ta’qibchilari (Lionel Messi 149 o‘yinda 120 ta gol) va Robert Levandovski (96 o‘yinda 73 ta gol) hisoblanadi.

“Yang Boyz” — Ronaldu Chempionlar Ligasi doirasida gol urgan 36-jamoa bo‘ldi. Ushbu ko‘rsatkich (musobaqada eng ko‘p jamoaga gol urish) bo‘yicha Krishtianu “PSJ” hujumchisi Lionel Messiga yetib oldi.

Ronaldu Chempionlar Ligasining ketma-ket 16-mavsumida gol urishni uddaladi. Ronaldugacha bu natijaga faqat ikki futbolchi erishgandi — Lionel Messi (“PSJ”) va Karim Benzema (“Real”).

“Yang Boyz” darvozasiga urilgan gol portugaliyalik uchun o‘ttiz yoshdan keyin Chempionlar Ligasida urilgan 63-gol bo‘ldi.

Foto: Getty Images

Bu ushbu yosh toifasidagi boshqa futbolchilardan kamida 35 taga ko‘p deganidir. 30 yoshidan keyin Ronaldu YChLda 68 ta o‘yin o‘tkazgan.