Qarshida harakatlanib ketayotgan Lacetti’da yong‘in chiqdi

Qashqadaryo viloyatining Qarshi shahrida yana bir avtomobil — harakatlanib ketayotgan Lacetti’da yong‘in chiqdi, deya xabar berdi “Daryo” muxbiri.

Voqeani aniqlashtirgan viloyat Favqulodda vaziyatlar boshqarmasi axborot xizmati rahbari Sohib Vaitov Qarshi shahar favqulodda vaziyatlar bo‘limiga yong‘in haqida soat 20:33 da xabar berilganini ma’lum qildi.

“Voqea joyiga Qarshi shahar favqulodda vaziyatlar bo‘limi 2-yong‘in-qutqaruv qismidan 1 ta bo‘linma soat 20:35 da yetib borib, taxminan, soat 20:41 da yong‘in to‘liq o‘chirildi. Yong‘in oqibatida Lacetti rusumli avtomobil zarar ko‘rgan. Moddiy zarar miqdori aniqlanmoqda. Yong‘in natijasidan hech kim tan jarohati olmaganligi ma’lum bo‘ldi”, — deydi Sohib Vaitov.

Sohib Vaitovning qo‘shimcha qilishicha, avtomobil egasi va unga ko‘maklashgan kishilar yong‘in haqida tezda xabar bermay, voqea joyiga kelib qolgan vodovozdan foydalanib, yong‘inni o‘chirishga harakat qilgan. Va yong‘inning kuchayib ketishiga sababchi bo‘lgan.

Eslatib o‘tamiz, avvalroq ham Qarshida yurib ketayotgan Nexia, shuningdek, svetoforning qizil chirog‘ida to‘xtab turgan Isuzu’ga urilgan Nexia-2 yonib ketgani haqida xabar berilgandi.