30-iyul kuni O‘zbekistonga koronavirusga qarshi 3 million 60 doza Moderna vaksinasi olib kelindi. Vaksina AQSh tomonidan Jahon sog‘liqni saqlash tashkilotining COVAX dasturi doirasida ajratilgan bo‘lib, maxsus havo qatnovi vositasida AQShning Alabama shtatidan mamlakatga yetkazib berilgan. Bu haqda SSV matbuot xizmati xabar berdi.
Aeroportda yukni qabul qilib olish jarayonida O‘zbekiston bosh vaziri o‘rinbosari Behzod Musayev, Sog‘liqni saqlash vaziri Abduhakim Xojiboyev, Sanitariya-epidemiologik osoyishtalik va jamoat salomatligi xizmati boshlig‘i, Davlat bosh sanitariya vrachi Bahodir Yusupaliyev, AQShning O‘zbekistondagi elchisi Deniel Rozenblyum, USAID’ning O‘zbekistondagi missiyasi direktori Mikaela Meredit, YuNISEFning O‘zbekistondagi vakolatxonasi rahbari Munir Mammedzade, Jahon sog‘liqni saqlash tashkilotining O‘zbekistondagi vakolatxonasi rahbari vazifasini bajaruvchisi Kristofer Fitspatrik va boshqa mas’ullar ishtirok etgan.
Ta’kidlanishicha, Moderna kompaniyasining koronavirusga qarshi qo‘llaniladigan 3 million 60 doza vaksinasini O‘zbekiston uchun AQSh beg‘araz ko‘mak tariqasida ajratgan.
Ma’lumot uchun, Moderna vaksinasi AQShda qo‘llanilayotgan 3 ta vaksinadan biri hisoblanadi. Shuningdek, AQSh Kasalliklar nazorati va ularning oldini olish bo‘yicha markazi (CDC) ma’lumotiga ko‘ra, Moderna kompaniyasining vaksinasi 94 foizdan ziyod samaradorlikka ega bo‘lgani holda COVID-19 virusi yuqishini bartaraf etadi.
Moderna vaksinasi JSST tomonidan favqulodda holatlarda foydalanish uchun tasdiqlangan (Pfizer, Johnson & Johnson kompaniyalarining vaksinalari, shuningdek, AstraZeneca kompaniyasining ikki turdagi preparatidan so‘ng) beshinchi vaksina hisoblanadi. JSST ekspertlar guruhi vaksinaning virusga qarshi 94,1 foiz samarador ekanini ta’kidlab, uni 18 yoshdan katta bo‘lgan barcha aholi guruhlari uchun tavsiya qilgan.
JSSTning ma’lumotiga ko‘ra, vaksina ko‘p dozali flakonda Selsiy bo‘yicha -25 darajada dan -15 darajagacha bo‘lgan muzlatilgan suspenziya sifatida yetkazilsa-da, flakonlarni birinchi dozani olishdan oldin 30 kungacha Selsiy bo‘yicha 2—8 daraja haroratda sovutgichda saqlash mumkin. “Bu degani preparatni joylarga yetkazish uchun sovuqlik zanjirini ta’minlovchi uskunalar bo‘lishi har doim ham shart emas. Uni oddiy sovutkichda ham saqlasa bo‘ladi. Mazkur vaksina teri ostiga yuboriladi, emlash 28 kunlik interval bilan ikki dozadan iborat”, — deyiladi xabarda.
Eslatib o‘tamiz, 2021-yilning mart oyida COVAX dasturiga asosan 660 ming doza AstraZeneca vaksinasi keltirilgan edi. Shunday qilib, mamlakatdagi jami vaksina zaxirasi 12 million 580 ming 60 dozani tashkil qilmoqda.
Ulardan:
- 370 ming dozasi “Sputnik V”;
- 710 ming dozasi AstraZeneca;
- 8,5 million dozasi ZF-UZ-VAC2001;
- 3 million 60 dozasi Moderna vaksinasidir.
Avvalroq Ozarbayjon O‘zbekistonga 50 ming doza AstraZeneca vaksinasini yuborgani, mamlakatga 1,2 million doza Pfizer vaksinasi olib kelinishi to‘g‘risida xabar berilgandi.
Izoh (0)