O‘zbekistonlik talaba Tokio Olimpiadasi ochilish marosimi o‘tkaziladigan stadionda yaponiyalik qizni zo‘rlaganlikda gumon qilinmoqda

30 yoshli O‘zbekiston fuqarosi Tokio—2020 Olimpiadasi ochilish marosimi bo‘lib o‘tadigan “Milliy” stadionda yaponiyalik qizga jinsiy zo‘ravonlik qilganlikda gumon qilinmoqda. Bu haqda The Japan Times Yaponiyaning turli OAVga tayanib xabar qilmoqda.

Politsiya bergan ma’lumotlarga ko‘ra, 16-iyul kuni talaba D. R. 20 yosh atrofidagi qizga zo‘ravonlik ishlatgani haqida ariza kelib tushgan.

Mahalliy OAVga ko‘ra, gumonlanuvchi qiz bilan voqea ro‘y bergan kuni tanishgan va ochilish marosimi repetitsiyasidan so‘ng unga tajovuz qilgan. Ularning ikkisi ham tayyorgarlik jarayoniga jalb qilingan ko‘ngilli ishchilar bo‘lgan.

NHK telekanalining xabar qilishicha, gumonlanuvchi ayblovlarni rad etmoqda va qiz uning harakatlariga qarshilik qilmaganini ta’kidlagan.

Avvalroq ayrim xorijiy OAVda O‘zbekiston delegatsiyasi a’zosi yaponiyalik qizga tajovuz qilgani haqidagi xabarlar yangradi. O‘zbekiston Milliy Olimpiya qo‘mitasi ushbu yangiliklar yuzasidan bayonot berdi.

“Hozir MOQ tezkor shtabining 5 nafar vakili Tokiodagi Olimpiya shaharchasida bo‘lib turibdi. Ularning vazifasi asosiy delegatsiya kelguniga qadar tashkiliy masalalarni hal etib turishdir. Tashkiliy qo‘mitaning talablariga ko‘ra, Olimpiya shaharchasidagi shaxslarning hududdan chiqib ketishi mumkin emas va u joy kuchli nazorat ostida.

Shunday ekan, yuqoridagi voqelikka O‘zbekiston Olimpiya delegatsiyasining hech qanday aloqasi yo‘q. Shu o‘rinda yurtimizning barcha OAV, bloger va jurnalistlaridan bu kabi asossiz maqolalarga ishonmasliklarini so‘rab qolamiz”, — deyiladi MOQ bayonotida.

Eslatib o‘tamiz, Tokiodagi Olimpiya o‘yinlari 23-iyul kuni start oladi va 8-avgustga qadar davom etadi.