O‘zbekiston
Tokio–2020 Olimpiadasida O‘zbekiston delegatsiyasining bayroqdorlari kim bo‘lishi ma’lum qilindi. Milliy olimpiya qo‘mitasi xabariga ko‘ra ochilish marosimda afsonaviy gimnastikachi Oksana Chusovitina va bokschi Bobo-Usmon Boturov bayroqdor bo‘ladi. Shu tariqa Oksana Chusovitina yozgi Olimpiya o‘yinlarida bayroqdor bo‘lgan dastlabki o‘zbekistonlik ayol atlet sifatida tarixdan joy oladi. Ochilish marosimining ssenariysiga ko‘ra barcha davlatlardan bir nafardan erkak va ayol sportchilar bayroqdor bo‘ladi. Bu Xalqaro olimpiya qo‘mitasi tomonidan targ‘ib qilinayotgan gender tenglik siyosatining amalda tatbiq etilishidir. Olimpiya o‘yinlarining ochilish marosimi 23-iyul kuni Toshkent vaqti bilan soat 16:00 da Tokiodagi “Olimpiya” stadionida boshlanadi. Rio–2016 Olimpiadasida boks bo‘yicha terma jamoasi a’zosi Bahodir Jalolov bayroqdor bo‘lgandi.
Tajribali hujumkor yarim himoyachi Sardor Rashidov yana legionerga aylandi. “Paxtakor”da to‘p surib kelgan Rashidov “Kuvayt SK” klubi bilan 1 yillik shartnoma imzolagan. Bu haqda futbolchining o‘zi “Daryo”ga ma’lum qildi. Qayd etish joiz, Sardor bungacha “Al-Jaish” (Qatar), “Al-Jazira” (BAA), “Nasional” (Portugaliya) va “Qatar SK” (Qatar) kabi klublarda legioner sifatida faoliyat yuritgan.
Namanganning “Navbahor” klubi Superliga ikkinchi davrasi oldidan Qirg‘izistonning “Oloy” klubi bilan o‘rtoqlik o‘yinida maydonga tushadi. “Lochinlar” matbuot xizmatiga ko‘ra uchrashuv 19-iyul kuni Namangandagi “Markaziy” stadionida bo‘lib o‘tadi. Bahs 18:00 da boshlanadi. Qayd etish o‘rinli, “Oloy” jamoasi 2021-yilda Tojikistonda markazlashgan holda o‘tkazilgan OFK Kubogi guruh bosqichida Qarshining “Nasaf” klubi bilan bir guruhdan joy olib, “ajdarlarga” 4:0 hisobida mag‘lub bo‘lgandi.
“Paxtakor” Ruslan Roziyev bilan shartnomani uzaytirdi. Poytaxt klubi 18 yoshli yarimhimoyachi bilan 2022-yilning oxiriga qadar mo‘ljallangan kelishuvga erishdi. Roziyev 2021-yilgi mavsumning birinchi davrasini “Neftchi”da ijara asosida o‘tkazgandi, endilikda u “Metallurg” safida faoliyatini davom ettiradi.
“Turon” ikkinchi davra oldidan tarkibda katta o‘zgarishlarni amalga oshirmoqda. PFL matbuot xizmatining yozishicha, 9 nafar futbolchi bilan shartnomalar bekor qilingan: Begzod Homidov, Otabek Miraliyev, Islomjon Abdullayev, Dostonbek Meliqo‘ziyev, Sardorbek Xursandov, Jasur Hakimov, Abdurahmon Abdulhaqov, Umarjon Sharipov. Avvalroq klub “Mash’al”ning ikki nafar futbolchisi va tojikistonlik himoyachini o‘z safiga qo‘shib olgandi.
“Metallurg” klubi ham bir qator shartnomalarni bekor qildi. Xususan, murabbiy Andrey Shipilov, futbolchilar Yevgeniy Makeyev (Rossiya) va Yevgeniy Chumak (Ukraina) bilan tuzilgan shartnomalar bekor qilingan. Makeyev 2021-yilgi mavsumda Superligada 4 ta o‘yin o‘tkazgan bo‘lsa, Chumakda bu ko‘rsatkich 3 taga teng. Har ikkala futbolchida ham samarali harakatlar yo‘q.
Shuningdek, “Mash’al” klubi ham yordamchi murabbiy Muhriddin Ortiqov va 4 nafar futbolchi bilan shartnomani bekor qildi: Shahzod Normurodov, Feruz Muinov, Doniyor Usmanov, Valijon G‘ulomjonov.
Jahon
“Real” va “Milan” klublari 8-avgust kuni Avstriyada o‘zaro o‘rtoqlik uchrashuvi o‘tkazadi. Bu haqda Madrid klubining Twitter sahifasida e’lon qilindi. Bu “qirollik klubi” uchun mavsum oldidan o‘tkaziladigan ikkinchi o‘yin bo‘ladi. Jamoa 25-iyul sanasida “Reynjers” bilan bahs yuritadi.A Seriya klublari 2022/23-yilgi mavsumdan boshlab yashil rangli sport formalaridan foydalana olmaydi. Bunday qarorga chiqarilishiga ushbu rangdagi libosning maysa bilan bir xil ekani sabab bo‘lgan.
UEFA Chempionlar Ligasi keyingi 4 ta finali mezbonlari nomini e’lon qildi. 2021-yilgi final Istanbuldan Portuga ko‘chirilgani bois UEFA 2023-yilgi o‘yinni Myunxendan Istanbulga ko‘chirdi. “Alyans Arena” esa 2025-yilgi finalga mezbon bo‘ladi.- 2022-yil — Sankt-Peterburg (Rossiya)
- 2023-yil — Istanbul (Turkiya)
- 2024-yil — London (Angliya)
- 2025-yil — Myunxen (Germaniya).
Transfer yangiliklari
Krishtianu Ronaldu shartnomasining oxiriga qadar “Yuventus”da qolishga qaror qildi. Football Italia’ning yozishicha, Ronaldu klubda qolmoqchi ekanini ma’lum qilgan. Shuningdek, na Ronaldu va na “Yuventus”ga transfer borasida hech qanday taklif kelib tushmagani aytilmoqda. Portugaliyalik 25-iyul sanasida ta’tildan qaytadi va Turin klubi mashg‘ulotlariga qo‘shiladi.
“Milan” Olivye Jiruni o‘z safiga qo‘shib oldi. Tomonlar ikki yillik shartnoma imzoladi. Fransuz yangi jamoasida 9-raqamda harakat qiladi. U bungacha “Chelsi” sharafini himoya qilayotgandi.
“Manchester Siti” Rahim Sterlingni sotib yubormoqchi. The Athletic nashrining yozishicha, “shaharliklar” bosh murabbiyi hujum chizig‘ini yangilashni xohlamoqda.
Rahimning klub bilan amaldagi shartnomasi 2023-yilda o‘z nihoyasiga yetadi. Transfermarkt portali uni 100 million yevroga baholamoqda.
Izoh (0)