Samarqand viloyati Ishtixon hokimligi matbuot xizmati xodimi jurnalist kamerasining fleshkasini “yeb qo‘ygani” haqida xabar berilgandi. 2021-yil 16-iyun kuni Samarqand viloyati hokimligi axborot xizmati hamda AOKA hududiy boshqarmasi tomonidan ushbu holat o‘rganildi.
Ma’lum qilinishicha, tuman hokimligi axborot xizmati rahbari MY5 telekanali muxbiri Otajon Rabbonaqulovga yong‘in bo‘lgan joy xavfli holatda ekanligini inobatga olib, yonib ketgan ustunlar odamlar ustiga qulashi mumkin, degan xavotirda “Fuqarolar tarqalgandan keyin tasvirga olasizlar”, deb undan kamerani o‘chirib turishni so‘ragan.
Natijada o‘rtada kelishmovchilik yuzaga kelgan. Ammo keyinchalik telekanal xodimlari baribir tasvirga olishni davom ettirgan.
Shundan so‘ng MY5 telekanali muxbiri kamerasi fleshkasini hokimlik axborot xizmati rahbari yutib yuborganligi haqida xabar tarqalgan.
Aniqlanishicha, hokimlik matbuot kotibi kamera fleshkasini olmaganini va uni yutib yubormaganini, bu gaplar asossiz ekanligini bildirgan.
Ma’lumotga ko‘ra, u jurnalistdan tasvirga olmasligini so‘ragan. “Odamlar tarqalganidan keyin qaytarib beraman” deb, operatorga aytgan holda kameraga teginganini aytgan.
MY5 telekanali muxbiri Otajon Rabbonaqulov ham boshida tuman hokimligi axborot xizmati rahbari tasvirga olishga qarshilik ko‘rsatganligini, keyinchalik esa muxbir tuman hokimi va boshqa bir qator fuqarolardan intervyu olganligini, matbuot kotibi bilan bozor hududini birga (boshqa fuqarolar ishtirokisiz) tasvirga olishganligini bildirgan.
Bundan tashqari, kamera fleshkasini matbuot kotibi yutib yuborganini o‘z ko‘zi bilan ko‘rmaganini, boshqalardan bu haqda eshitgani hamda o‘zi tayyorlagan lavhada ham va boshqa nashr muxbirlari bilan suhbatda ham fleshka yutib yuborildi degan so‘zni ishlatmaganini bayon etgan.
Kameraning ishdan chiqqanligi vaji bo‘yicha esa ayni paytda kamera ishlab turganligini, biroq tasvir sifati biroz pastligini (tasvirlar qoraroq) aytgan.
Ma’lum bo‘lishicha, Ishtixon tuman hokimining 2021-yil 16-iyundagi farmoyishi bilan Boboyev Ilhomjon Isoqovichga hayfsan intizomiy jazo chorasi qo‘llanilgan.
MY5 telekanali muxbiri Otajon Rabbonaqulovga esa telekanal mulkiga ziyon yetkazilganligi vaji bo‘yicha asos mavjud bo‘lgan holatda sudga murojaat qilish zarurligi tushuntirilgan. Shundan so‘ng muxbir kamera buzilganligi holati bo‘yicha sudga murojaat qilmasligini, da’vosi yo‘qligini bildirgan.
Avvalroq Samarqandda signal chalgani uchun Damas’ni jarima maydoniga joylashtirishni buyurgan YHXB boshlig‘iga hayfsan berilgani hamda “Daryo” muxbiriga qo‘pollik qilgan Qarshi shahar bosh “militsioneri” o‘rinbosari, kutilganidek, hayfsan olgani haqida xabar berilgandi.
