Xususiy bandlik agentliklari tomonidan 2019—2020-yillarda 3 ming 300 ga yaqin fuqaro Rossiya, Turkiya kabi davlatlarga qonuniy tarzda ishga joylashtirildi. Bu haqda AOKAda o‘tkazilgan matbuot anjumanida Bandlik va mehnat munosabatlari vazirligi mutasaddilari ma’lum qildi.
“Bugungi kunda Bandlik va mehnat munosabatlari vazirligining xususiy bandlik agentliklari reyestridan 106 ta yuridik shaxs ro‘yxatdan o‘tgan bo‘lib, ulardan 78 tasiga xorijda ishlash istagidagi fuqarolarni ishga joylashtirish bo‘yicha faoliyatni amalga oshirish huquqini beruvchi litsenziya taqdim etilgan.
O‘tgan davr mobaynida 65 ta xususiy bandlik agentligining litsenziyasi bekor qilinib, ularning soni bugungi kunda 13 tani tashkil etmoqda. 13 taning 5 tasi faoliyat yuritmoqda, 8 tasining jamg‘arma puli shakllantirgunga qadar faoliyati to‘xtatilgan.
2019—2020-yillarda XBAlarning sa’y-harakati natijasida 3 ming 300 ga yaqin fuqaro Rossiya, Turkiya kabi davlatlarga qonuniy tarzda ishga joylashtirildi. Biroq xususiy bandlik agentliklari tomonidan litsenziya talablari va shartlarini buzish holatlari uchramoqda”, — deyiladi xabarda.
Bundan avval O‘zbekistonda 2600 dan ortiq kishini chuv tushirgan International Job Organization agentligi rahbarlari ustidan sud hukmi e’lon qilingani, MIB Korean and migrations xususiy bandlik agentligidan jabr ko‘rgan fuqarolarga qancha mablag‘ qaytarilganini ma’lum qilgani hamda O‘zbekistonda 3 ta xususiy bandlik agentligining faoliyati vaqtincha to‘xtatilgani haqida xabar berilgandi.
Izoh (0)