Toshkent shahrida Nikolay Pirogov nomidagi Rossiya milliy ilmiy-tekshirish tibbiyot universitetining filiali ochilishi rejalashtirilmoqda, deya xabar berdi SSV matbuot xizmati.
Vazir Mixail Murashko boshchiligidagi Rossiya Sog‘liqni saqlash vazirligi delegatsiyasining O‘zbekistonga tashrifi doirasida Chilonzorda Rossiya milliy ilmiy-tekshirish tibbiyot universitetining filialini ochish masalasiga e’tibor qaratildi.
Bu borada 28-may kuni Sog‘liqni saqlash vazirligi va Nikolay Pirogov nomidagi Rossiya milliy ilmiy-tekshirish tibbiyot universiteti o‘rtasida hamkorlik to‘g‘risida kelishuv imzolandi.
Hamkorlik dasturini amalga oshirishning birinchi bosqichi doirasida Toshkent shahrida yuqorida aytib o‘tilgan Rossiya universitetining ordinaturada (keyinchalik aspiranturada) yuqori malakali kadrlar tayyorlash va tibbiyot xodimlariga qo‘shimcha kasbiy ta’lim berish bo‘yicha filialini ochish rejalashtirilgan.
Delegatsiya a’zolari klinik bazalar sifatida tanlangan ushbu tibbiyot muassasalariga ham tashrif buyurdi.
Universitet filialini joylashtirish uchun ta’lim faoliyatini amalga oshirishda zarur bo‘lgan binolar majmuasiga ega bo‘lgan va belgilangan klinik bazalar yaqinida joylashgan Chilonzor tibbiyot kolleji tanlangan.
Filial binolari va inshootlarini rekonstruksiya qilish (qurish) hamda o‘quv va simulyatsiya uskunalari bilan jihozlash bilan bir qatorda Respublika shoshilinch tibbiy yordam ilmiy markazi va Respublika ixtisoslashtirilgan xirurgiya ilmiy-amaliy tibbiyot markazini ham yuqori malakali shifokorlarni tayyorlash uchun zarur bo‘lgan zamonaviy tibbiyot yuqori texnologik uskunalari bilan jihozlash rejalashtirilgan.
Loyihani amalga oshirish natijasida RShTYoIM, RIXIATM Rossiya universitetining filiali bilan birgalikda O‘zbekistonning yetakchi konsultativ, tibbiy (keyinchalik ilmiy) va o‘quv markazlariga aylanadi.
Talabalarni ordinatura (keyinchalik aspirantura)ga o‘qishga qabul qilish mamlakatdagi tibbiyot oliy o‘quv yurtlari bitiruvchilari o‘rtasida tanlov e’lon qilish yo‘li bilan amalga oshiriladi.
Universitet filialining professor-o‘qituvchilar tarkibi Rossiya universiteti xodimlari, mamlakat mutaxassislari va kelajakda filialning eng yaxshi bitiruvchilaridan shakllantiriladi.
Bundan avval Yangi O‘zbekiston universiteti tashkil qilinishi, Toshkentda Vengriyaning Debretsen universiteti filiali ochilishi hamda Jizzaxda Hindistonning Sambhram texnologiya instituti filiali ochilishi haqida xabar berilgandi.
Izoh (0)