Jons Hopkins universiteti ma’lumotlariga ko‘ra, dunyo bo‘yicha COVID-19’ni yuqtirib olganlar soni 156 117 850 kishiga yetdi. Ushbu ko‘rsatkich bo‘yicha AQSh (32,6 million), Hindiston (21,4 million), Braziliya (15 million), Fransiya (5,7 million) va Turkiya (4,9 million) doimgidek yetakchilik qilmoqda. Global o‘limlar soni esa 3 257 754 taga yetdi.

Foto: AP Photo

Vashington universiteti Salomatlik ko‘rsatkichlari va baholari instituti (Institute for Health Mterics and Evaluation — IHME) ma’lumotlariga ko‘ra, koronavirus pandemiyasi butun dunyoda 6,9 million kishini hayotdan olib ketgan, bu rasmiy statistikadan ikki barobar ko‘p demakdir.

IHME sog‘liqni saqlash sohasidagi mustaqil tadqiqot tashkiloti bo‘lib, avvalroq Oq uy undan manba sifatida foydalangan edi, hisobotlarni esa sog‘liqni saqlash sohasidagi rasmiy shaxslar kuzatib boradi.

Institut tomonidan olib borilgan tadqiqotlar shuni ko‘rsatdiki, COVID-19 oqibatidagi o‘lim holatlarining ko‘pchiligi tegishli ravishda ro‘yxatdan o‘tkazilmaydi, chunki aksariyat mamlakatlar kasalxonalarda yoki infeksiya tasdiqlangan bemorlarda yuz bergan o‘limlarnigina qayd etadi.

IHME’da ta’kidlashlaricha, koronavirusdan o‘lim darajasining rasmiy ko‘rsatkichlari ko‘p jihatdan turli mamlakatlardagi testdan o‘tkazish darajasiga bog‘liq.

Institut mutaxassislari tahlilni pandemiyadan oldingi tendensiyalarga asoslangan holda barcha sabablarga ko‘ra kutilgan o‘limlarni pandemiya oqibatidagi barcha o‘limlarning faktga asoslangan soni bilan qiyoslab o‘tkazdi.

Moldova prezidenti Mayya Sandu 7-may, juma kuni koronavirusga qarshi vaksinaning birinchi dozasini oldi. U AstraZeneca Britaniya-Shvetsiya vaksinasi bilan emlandi.

“Bugun COVID-19’ga qarshi AstraZeneca vaksinasining birinchi dozasini oldim. Menda shunday imkoniyat borligidan xursandman, chunki o‘zimning va men muloqotda bo‘ladigan oilam, do‘stlarim va hamkasblarimning salomatligini aynan shu yo‘l bilan asrayman”, — deb yozdi Sandu Facebook’da.

U tibbiyot xodimlariga koronavirusga qarshi kurashdagi sa’y-harakatlari uchun minnatdorlik bildirdi va fuqarolarni undan namuna olishga chaqirdi.

AQSh oziq-ovqat va dori vositalari sifati ustidan sanitar nazorat boshqarmasi (FDA) Amerikaning Johnson & Johnson kompaniyasi ishlab chiqargan qariyb 70 million doza vaksina sifatini tekshirmoqda. Gap Merilend shtati Baltimor shahridagi zavodda chiqarilgan va mamlakat ichkarisida tarqatilishi ko‘zda tutilgan partiyalar haqida bormoqda.

Aprel boshida zavodda standartlarga to‘g‘ri kelmaydigan bitta partiya aniqlangan edi. OAVlarga ko‘ra, zavod ishchilari Johnson & Johnson uchun mo‘ljallangan masalliqlarni AstraZeneca vaksinasi masalliqlari bilan aralashtirib yuborgan, oqibatda 15 millionta doza yaroqsiz holga kelgan. Endi esa FDA o‘sha vaqtda ishlab chiqarilgan yana 70 millionta dozaning sifatiga shubha qilmoqda.

FDA mutaxassislari ma’lumotlariga ko‘ra, vaksina komponentlarining aralashib ketishi turli preparatlar ishlab chiqariladigan zonalararo harakatlanish chog‘ida dezinfeksiyadan o‘tmagan ishchilar tufayli yuz bergan bo‘lishi mumkin.

Maldiv orollari Sog‘liqni saqlash agentligi 6-maydan mamlakat poytaxti Male va uning atrofida komendantlik soatini joriy qildi. U 21:00 dan 04:00 gacha amal qiladi.

Kuryerlar, shuningdek, shoshilinch zaruriyati bo‘lgan fuqarolar uchun politsiya maxsus ruxsatnomalar beradi.

Guruh bo‘lib sport bilan shug‘ullanish taqiqlanadi, trenajyor zallari, kinoteatrlar va salonlar 7-maydan vaqtinchalik yopiladi.

Maldiv orollarida 5-may kuni 700 kishida COVID-19 aniqlangan, kasallanganlarning umumiy soni esa 32 mingdan oshdi.