Bukingem saroyi qirolicha Yelizavetaning turmush o‘rtog‘i vafotidan keyingi ilk fotosuratlarini e’lon qildi

Bukingem saroyi Buyuk Britaniya qirolichasi Yelizaveta II ning 9-aprelda 99 yoshida vafot etgan turmush o‘rtog‘i shahzoda, Edinburg gertsogi Filipp bilan vidolashuv marosimidan keyingi ilk fotosuratlarini e’lon qildi. Suratlarda qirolichaning moviyrang kiyim kiygani va yuzida tabassum borligini ko‘rish mumkin, deb yozmoqda “TASS”.

Fotosuratlar 27-aprel tongida olingan va ularda qirolichaning virtual formatda Latviya hamda Kot-d’Ivuarning yangi elchilaridan ishonch yorliqlarini qabul qilib olish marosimi haqida hikoya qiladi. Yelizaveta II Londondagi Vindzor saroyidan turib, videokonferensaloqa tarzida Bukingem saroyiga kelgan elchilar bilan muloqot qilgan. 95 yoshni qarshilagan qirolicha koronavirus pandemiyasi sabab aynan Vindzorda bo‘lib turibdi.

Bu Yelizaveta II uchun turmush o‘rtog‘i vafotidan keyingi birinchi rasmiy tadbir emas. Qirolicha o‘z vakolati doirasidagi vazifalarni bajarishga 13-apreldan kirishgan. Shu kuni u qirollik saroyida lord-kamerger lavozimida ishlagan Uilyam Pilni nafaqaga kuzatgan va uning o‘rnini egallagan yangi amaldor, bir vaqtlar Britaniya kontrrazvedkasi MI-5 xizmatiga rahbarlik qilgan Endryu Parkerga spiketrni topshirgandi. Qirollik oilasining ikki haftalik motami 23-aprelda o‘z nihoyasiga yetgan.

Filippning dafn marosimi 17-aprelda Vindzordagi saroy hududida o‘tkazilgan. Koronavirus sabab joriy qilingan cheklovlar tufayli marosimda 30 kishi ishtirok etgan. Yelizaveta II Edinburg gertsogi bilan bir oila sifatida 73 yil umr kechirdi. Ushbu vaqt davomida ular to‘rt nafar farzandni voyaga yetkazdi – valiahd shahzoda Charlz Uelskiy, malika Anna, York gertsogi Endryu va Uesseksk grafi Edvard, shuningdek, qirolichaning sakkiz nafar nevara va o‘n nafar evarasi bor.