Bloger Shahnoza Soatova Toshkentdagi maktablardan birida dars payti bolalarning kalta paypoq kiygan-kiymagani tekshirilgani, buni LGBTga qarshi kurash, deb tushuntirish berilganini aytgandi. Xalq ta’limi vazirligi mazkur hodisa Mirobod tumanidagi 110-maktabda yuz bergani, ammo keltirilgan holat yuzasidan maktablarga hech qanday topshiriq berilmaganligini, haqiqiy holat bo‘yicha o‘rganish ishlari olib borilayotganini ma’lum qilgandi. Vazirlik o‘rganishlar natijasi va o‘sha kuni qayd etilgan videotasvirni e’lon qildi.
Ma’lum qilinishicha, videotasvirdagi holat 110-umumta’lim maktabining chaqiruvga qadar boshlang‘ich tayyorgarlik fani o‘qituvchisi hamda direktor o‘rinbosari o‘quvchining telefon o‘ynab o‘tirganini hamda o‘qituvchiga nisbatan hurmatsizlikni ko‘rib, sinfga kirishga majbur bo‘lgan vaqtida yuz bergan.
Telefon bilan bog‘liq holat muhokama qilinganidan so‘ng, ular tomonidan bolalar tartibga chaqirilgan hamda o‘quvchilarning o‘zlarini darsda tutishlari, o‘qituvchiga hurmat, darsga e’tibor qilish, jismoniy tarbiya kiyimida darsda o‘tirmaslik kabi masalalar bo‘yicha tushuntirish berilgan.
“Videotasvirdan bu holat bloger aytganidek 20 daqiqa emas, 9 daqiqa davom etgani ko‘rinib turibdi. O‘zbek tili darsi buzildi deb jar solayotgan o‘zbek tili himoyachisi o‘quvchilarning o‘zbek tili o‘qituvchisini va darsni qanchalik behurmat qilayotganini ham ushbu videodan xolis o‘rganib, ota-onalarni ham o‘z farzandlari tarbiyasiga e’tiborliroq bo‘lishga chaqirishini istab qolardik”, — deyiladi vazirlik xabarida.
Xalq ta’limi vazirligi taqdim etgan videotasvir diqqat bilan kuzatilsa, o‘qituvchi tomonidan dars so‘ngigacha muhokamalarga sabab bo‘lgan mavzu haqida so‘z bormagan. Muhokamalarga sabab bo‘lgan mavzu tanaffusga qo‘ng‘iroq chalinganidan so‘ng, o‘qituvchi tomonidan o‘quvchi qizning “Nega bunday kiyimga e’tibor qilyapsizlar” degan mazmundagi savoliga javob tarzidagi shaxsiy fikri sifatida aytilgan.
“O‘quvchilarning xatti-harakatlari tufayli 2 nafar erkak o‘qituvchi biroz qizishib gapirgan va direktor o‘rinbosar kelgusida bunday holatga yo‘l qo‘ymaslik bo‘yicha ogohlantirilgan. Lekin videodan ko‘rinib turibdiki, ataylab shov-shuv qilingan mavzu bo‘yicha o‘qituvchi kirib darsda ma’ruza qilmagan va bolalar paypog‘ini o‘lchab rasmga olmagan. Bu bo‘yicha vazirlik tomonidan maktablarga hech qanday topshiriq bo‘lmaganligini ham avval ma’lum qilganmiz”, – deyiladi vazirlik xabarida.
Xalq ta’limi vazirligi ota-onalarni mabodo maktabda qandaydir salbiy holat yuz bergani haqida gumon qilinsa, holatni o‘rganmasdan, internetda shov-shuv ko‘tarmaslikka, aksincha maktab rahbariyatiga yoki tegishli organlarga murojaat qilishga chaqirgan.
